اسلامي مارت د قرغېزستان ولسمشر د هغو څرګندونو هرکلی وکړ چې وایي د مرکزي اسیا امنیت د افغانستان له سیاسي ثبات سره تړلی.
د اسلامي امارت مرستیال ویاند وایي، د سیمې نور هېوادونه هم باید دا درک کړي چې افغانستان د سیمې په سیاسي ثبات کې رغنده رول لري.
حمدالله فطرت زیاتوي، اسلامي امارت اوسمهال د قرغېزستان په ګډون له ټولو سیمهییزو هېوادونو سره په بېلابېلو برخو کې مثبتې اړېکې لري.
د اسلامي امارت مرستیال ویاند دغه راز وایي: « موږ د افغانستان په تړاو د قرغېزستان ولسمشر رغنده نظر تاییدو او د دوی د دې موقف هرکلی کوو. دا واقعیت باید نور هېوادونه هم درک کړي چې افغانستان د سیمې په ثبات کې مهم رول لري. افغانستان هم د سیمه ییز ثبات، امنیت او اقتصادي اتصال په برخو کې خپلو مسوولیتونو ته ژمن دی. موږ دا مهال د قرغېزستان په ګډون د ګاونډ او سیمې له هېوادونو سره ښې او رغنده اړیکې لرو او غواړو په مختلفو برخو کې دغه اړیکې لا پراخې او پياوړې کړو.»
د قرغېزستان ولسمشر د ملګرو ملتونو امنیت شورا د لنډمهاله غړو ټاکنې په اړه ناسته کې ویلي، د غړیتوب ترلاسه کولو په صورت کې به د افغانستان وضعیت ته ځانګړی پام وکړي.
د صدر جباروف په خبره، د قرغېزستان دریځ دا دی چې د مرکزي اسیا امنیت د افغانستان له ثبات سره تړلی او دوی په نړیواله ټولنه کې په تدریجي ډول د افغانستان د اقتصادي او سیاسي ادغام ملاتړ کوي.
نوموړي زیاته کړې، قرغېزستان له افغانانو او په تېره بیا له ښځو او ماشومانو سره دوامداره مرستې کوي.
ولسمشر صدر جباروف دغه راز ویلي: « قرغېزستان په پام کې لري چې د افغانستان وضعیت ته ځانګړی پام ور واړوي. زموږ دریځ دا دی چې د مرکزي اسیا امنیت د دې هېواد له ثبات سره تړاو لري. موږ له افغانانو او په تېره بیا له ښځو او ماشومانو سره دوامداره مرستې کړې او په نړیواله ټولنه کې په تدریجي ډول د افغانستان د اقتصادي او سیاسي ادغام ملاتړ کوو.»
جباروف په امنیت شورا کې له هېوادونو سره پر دوه ګوني چلن او د بشري مسایلو پر سیاسي کولو نیوکه کړې او ویلي یې دي چې د شورا مکانېزمونه ډېر کله د اصلي مسایلو په ځای، پر کوچنیو او کم اهمیته موضوعاتو ورټول وي.
هغه دغهراز ویلي، که د امنیت شورا موجوده نابرابره جوړښت او په کې د کوچنیو، وچه کې ایسارو او مخ پر ودې هېوادونو نه شتون دوام وکړي، دا به د جمعي امنیت جوړښت ته زیان ورسوي.
د سیاسي چارو شنونکی خلیلاحمد نادم وايي: « که په افغانستان کې ثبات او امنیت وي، هلته منځنۍ اسیا کې به هم ثبات وي. همدارنګه د دوی اقتصادي وده هم د افغانستان په ثبات پورې تړلې ده. که افغانستان له اقتصادي پلوه وده کوي، هېڅ شک نه شته چې دا هېوادونه به هم ورسره وده کوي.»
شنونکي د مخ پر ودې هېواد په توګه له قرغېزستان او د مرکزي اسیا له نورو هېوادونو سره د سیاسي او اقتصادي اړیکو ټینګښت د افغانستان په ګټه بولي.
دوی باور لري چې د مرکزي اسیا بلاک له موجوده تعامل څخه په استفادې په سیمهییزو ناستو کې د اسلامي امارت او نړۍ ترمنځ اړیکو کې مثبت بدلون راولي.
د سیاسي چارو شنونکی شېرحسن حسن وايي: « په افغانستان کې د امنیت لپاره سیمه ییزه همکاري ډېره ضروري ده. د دې امنیت په ټینګښت او دغه راز په سیاسي او اقتصادي چارو کې د افغانستان ور ګډول به دا امنیت نور هم د ثبات خواته یوسي. کله چې د یوه هېواد ګټې له اقتصادي پلوه افغانستان سره غوټه وي، دا هېواد د افغانستان له امنیت سره علاقمند کېږي.»
دا په داسې حال کې ده چې واک ته له رسېدو سره سم اوسنی حکومت د ګاونډ او سیمې په شمول د مرکزي اسیا له هېوادونو سره پر متقابل درناوي د ښو اړیکو غوښتنه کړې او پر همدې دریځ ټینګ ولاړ دی.
