Skip to content
د پلازمېنې کابل په حضوري چمن کې سلګونو کسانو ځايونه نيولي،ترڅو د کارېدلو توکو د خرڅلاو هټۍ په کې جوړې کړي.
د حضوري چمن په څنډو کې د کارېدولو توکو لنډمهالي دوکانونه جوړ شوي وو،چې اوس د حضوري چمن داخل ته لېږدول کېږي.
خلکو پر خپل سر د ځان لپاره ځايونه جر کړي او تر اوسه پرې څو ځل خلکو جنګونه هم کړي دي.
د کابل ښار یو تن اوسېدونکی وايي:« بل ځای د کار لپاره نه شته. هرچا پر خپل سر ځای نیولی دی. دلته یو ځل سهار جنګ وشو او یو ځل پرون.»
بل پلو ورزشکاران او تفريح کونکي بیا واي، د پام بدلولو او سپورت لپاره یې همدا یو ځای درلود،چې له دې وروسته به دا هم نه وي.
حضوري چمن که څه هم پر يو خړ ميدان بدل شوی وه،خو بيا هم ګڼو خلکو لپاره د وخت تېرۍ ځای و او هره ورځ به په کې لسګونه ځوانانو لوبې کولې.
یو تن ورزشکار وايي:« موږ به وړاندی دلته راتلو، د کرېکټ او نورو لوبو لپاره اوس دا ځای هم نور نه شته دی. موږ به خپل فکر دلته بدلوه.»
بلخوا د کارېدولو توکو پلورنکي وايي، مناسب ځای ورته نه شته او حکومت بايد يو داسې ځای جوړ کړي،چې هم په کې د دوی مزدوري وشي او هم نورو کسانو ته خنډ ونه ګرځي.
د کارېدلو توکو یو تن پلورونکی وايي:« بله چاره نه شته دی. ټول غریب دی. دا ځای اصلا د لوبو لپاره دی.»
د ښار په زياترو واټونو اوس د کارېدلو توکو بازارونه جوړ شوي دي، دا توکي د هغو کسانو دي،چې بهر ته تلونکي دي او يا له ډېرې بې وسۍ د خپل کور قیمتي توکي پلوري.
