د قزاقستان لومړي وزير مرستيال او د دې هېواد د سوداګرۍ وزير پر مشرۍ پلاوی کابل ته راغلی او د افغانستان او قزاقستان ترمنځ د اړيکو پراختيا په موخه يې د سرپرست حکومت له ځينو لوړ پوړو چارواکو سره ليدلي دي.
ارګ وايي، د قزاقستان لومړي وزير مرستيال سريک ژومانګرين د رياست الوزرا له اقتصادي مرستيال ملاعبدالغني برادر اخوند او ځينو نورو لوړپوړو چارواکو سره د کابل او استانې پر اړيکو غږېدلی.
په دې ليدنو کې د دواړو هېوادونو ترمنځ د اقتصادي اړيکو لاښه والي ترڅنګ په افغانستان کې د اساسي پروژو د تطبيق پر سر هم نظرونه تبادله شوي.
د اسلامي امارت مرستیال وياند حمدالله فطرت وايي: « د ریاستالوزراء اقتصادي مرستیال محترم ملا عبدالغني برادر اخوند د قزاقستان د لومړي وزیر مرستیال ښاغلي سریک ژومانګارین او مل پلاوي سره په ګلخانې ماڼۍ کې وکتل. د دې کتنې پرمهال دواړو لوریو د افغانستان او قزاقستان د اقتصادي اړیکو پر پراخوالي، پانګوالو ته د فرصتونو پر برابرولو او د سوداګرۍ د لا پیاوړتیا پر لارو چارو خبرې وکړې. همداراز نوموړي څرګنده کړه چې اسلامي امارت د څلورو هېوادونو (افغانستان، ایران، قزاقستان او ترکمنستان) د صنعتي، سوداګریزو او ټرانسپورټي همکاریو د همغږۍ په موخه د واحد مرکز اړوند موافقتنامې مسوده ترتیب او له قزاقستاني لوري سره یې شریکه کړې ده.»
له دې سره هم مهاله، د صنعت او سوداګرۍ وزارت هم د ياد وزارت سرپرست او قزاقي پلاوي ترمنځ د ليدنې خبر ورکړی او وايي، د يادې ليدنې موخه په کابل کې د افغان- قزاق تر نامه لاندې نندارتون جوړېدنه وه.
د صنعت او سوداګرۍ وزارت زیاته کړې: « ټاکل شوې د افغان- قزاق نندارتون د دواړو هېوادونو د دولت او خصوصي سکټور د چارواکو په موجوديت کې سبا سې شنبه پرانیستل شي. د دې نندارتون له لارې به د سوداګرۍ، پانګونې او ټرانزیټ په برخه کې د همکاريو فرصتونه و ارزول شي.»
په ورته مهال د اقتصادي چارو شنونکي دا ډول ليدنې د دواړو هېوادونو ترمنځ د اقتصادي او سوداګريزو اړيکو د پراختيا ترڅنګ په افغانستان کې د اساسي پروژو د تطبيق په برخه کې هم مهمې بولي.
د اقتصادي چارو شنونکی عبدالنصیر رشتیا وايي: « زه فکر کوم افغانستان ته د قزاقي پلاوي سفر ډېر اهمیت لري. قزاقستان غواړي له افغانستان سره اړیکې نورې هم ټینګې کړي او علاقه لري چې د افغانستان له لارې سوېلي آسیا سره وصل شي. له بلې خوا، قزاقستان هڅه کوي چې د افغانستان او ترکمنستان په شمول له ګاونډیو هېوادونو سره ښې اړیکې ولري.»
له دې وړاندې د قزاقستان د ستراتيژيکو مطالعاتو انسټېټيوټ ریيس هم کابل ته راغلی و او د بهرنيو چارو وزارت له سرپرست سره يې د کابل او آستانې ترمنځ د اړيکو پر پراختيا خبرې کړې وې.
