د کرونا ویروس مخنیوي په موخه کابل ته د چین مرسته راورسیده.
د کرونا ویروس تشخیص او مخنیوي برخه کې د متحده عرب اماراتو د مرستو سربیره، کابل ته د چین د مرستو لومړۍ طبي بسته هم راورسېده.
کابل کې د چین سفارت وایي، په دې بسته کې د کورونا ویروس د تشخیص وسایل، ماسکونه او نورې طبي الې شاملې دي چې باور لري اغېزمنې به ثابتې شي.
کابل لپاره د چین سفیر وايي، دا د مرستو لومړۍ بسته ده او د خپل وس سره سم به نورې مرستې هم وکړي.
کابل کې د چین سفیر وانګ یي داسې وویل (( خپلې تجربې او مرستې مو د افغانستان په ګډون د ۸۹ هېوادونو او ۴ نړیوال سازمانونو سره شریکې کړي او باور لرو چې له افغانستان سره زموږ دغه مرسته به بیړنۍ اړتیا پوره کولو کې مرسته وکړي او ډاډه اوسئ چې چین د کورونا ویروس مخنیوي برخه کې تل د افغانانو ملاتړ کوي.))
افغان حکومت، د چین له مرستو په مننې یادونه وکړه چې نړیوال بانک له افغانستان سره د کرونا ویروس مخنیوي برخه کې ۱۰۰ میلیونه ډالره، امریکا ۱۵ نیم میلیونه ډالره او دغه راز یو شمېر نور هېوادونه هم مرسته کوي.
حکومت وایي، دوی به دغه مرستې په روښانه او اغیزمنه توګه مصرف کړي، بې وزله او اغیزمنو خلکو ته به ورسیږي.
د ولسمشر دویم مرستیال سرور دانش وایي حکومت د کابل لپاره ۵۰۰ میلیونه افغانۍ، هرات لپاره ۴۰۰ میلونه او د نورو ټولو ولایتونو لپاره ۷۰ – ۷۰ میلیونه افغانۍ بودیجه ځانګړې کړې چې د کورونا ویروس مخنیوی وشي.
حکومت وایي، د هرات سربیره، کابل کې د کورونا ویروس مثبتې پېښې په زیاتېدو دي او د مخنیوي په موخه به یې تدابیر نور هم جدي کړي چې پر تګ راتګ به بندیز پورې کړي او خلک به اړ کړي چې د ډاکترانو سپارښتنې عملي کړي.
چین په داسې حال کې افغانستان سره د کورونا ویرویس مخنیوي برخه کې مرسته کوي چې په افغانستان کې ۱۳۹ تنه په کرونا اخته پېژندل شوي او لسګونه نورې شکمنې پېښې تر معایناتو لاندې دي.
