د امریکا د بهرنیو چې وزیر انتوني بلېنکین نن په یو ناڅاپي سفر کابل ته راغی او له ولسمشر غني او د مصالحې عالي شورا له مشر عبدالله عبدالله سره یې جلا جلا ناستې درلودلې.
ارګ وایي، ولسمشر غني له بلېنکین سره په کتنه وویل چې د ولسمشر جو بايډن د پرېکړې درناوی کوي او زیاته یې کړه، دا مهال افغان ځواکونه په یواځې توګه د خپلې خاورې او هېواد د ساتنې وړتیا لري او افغان ولس د خپلو امنیتي او دفاعي ځواکونو ملاتړی دی.
ارګ زیاتوي چې د امريکا د بهرنیو چارو وزیر بیا ټينګار وکړ چې له افغانستان د امریکایي ځواکونو وتل به د دواړو هېوادونو ترمنځ د ستراتېژیکو مناسباتو د کمزورۍ په معنی نه وي او امریکا له افغان دولت او خلکو سره خپلو تعهداتو ته ژمن دي.
بلېنکین وویل، امریکا له افغانستان او د دغه هېواد له امنیتي او دفاعي ځواکونو څخه خپل ډیپلوماتیک او بشردوستانه ملاتړ ته ادامه ورکوي او د افغانستان سولې بهیر د اسانتیا په موخه به خپلو هڅو ته دوام ورکړي.
د مصالحې عالي شورا مشر عبدالله عبدالله هم د امريکا د بهرنیو چارو وزیر انتوني بلېنکین سره کتلي.
په دغه کتنه کې ښاغلي عبدالله ويلي چې د ولسمشر جو بايډن د پرېکړې ملاتړ کوي او دغه راز یې له افغانستان سره د امریکا له همکاریو هم مننه وکړه.
له دغو کتنو څخه وروسته، د امریکا د بهرنیو چارو وزیر انتوني بلېنکین یوې خبرې ناستې ته وینا وکړه او وې ویل، چې امریکا خپل ځواکونو د ۲۰۲۱م کال د سپټمبر تر ۱۱مې نېټې وباسي.
د امریکا د بهرنیو چارو وزیر انتوني بلېنکین وایي، افغانستان هېڅکله هم ۹۰مې لسیزې ته نه ورګرځي او کورنۍ جګړه هم ناشونې ده، ځکه چې اوسنی افغانستان د ۲۱مې پېړۍ افغانستان دی.
هغه دغه راز وویل چې د امریکا ځواکونو وتلو سره سره به امریکا له افغانستان سره خپلو همکاریو ته دوام ورکړي.
بلېنکین دا هم وویل چې ولسمشر غني او عبدالله دواړو له افغانستان د امریکایي ځواکونو د وتلو ملاتړ کړی.
پرون د امریکا ولسمشر او ناټو اعلان وکړ چې د روان زیږدیز کال د مې میاشتې له لومړۍ نېټې د خپلو ځواکونو د وتلو بهیر پیلوي.
له بلې خوا، طالبان له افغانستانه د امریکایي ځواکونو د وتلو په تړاو د ولسمشر جو بایډن دا پرېکړه د دوحې تړون څخه سرغړونه بولي او له نړیوالو یې غوښتي چې په امریکا فشار راوړي ترڅو په ټاکلي وخت له افغانستانه ووځي.
طالبان زياتوي، که د امریکا له لوري د دوحې تړون نقض کېږي، نو ورسره طالبانو ته هم د هر ډول لازم اقدام کولو لاره پرانيستل کېږي، چې د راتلونکو عواقبو مسئولیت به یې امریکايي جهت ته راجع وي.
د دوحې تړون له مخې، امریکا مکلفه ده چې د مې میاشتې تر لومړۍ نېټې خپل ټول سرتیري له افغانستانه وباسي.
