په داسې حال کې چې پاکستان له افغانستان سره د سوداګرۍ او ټرانزیټ په برخو کې د ستونزو پر جوړولو تورن دی، کابل ته د ياد هېواد د سوداګرۍ وزارت مرستیال محمد خرم آغا پر مشرۍ راغلی پلاوی له سرپرست حکومت سره د سوداګرۍ او ټرنزيټي ستونزو د حل لپاره پر خبرو بوخت دی.
د صنعت او سوداګرۍ وزارت سرپرست نورالدين عزيزي وايي، د سوداګرۍ او ټرانزیټ اړوند ستونزو حل د حکومت په لومړيتوب کې ځای لري او په خبره يې له پاکستاني لوري سره د سوداګرۍ او ټرانزیټ اړوند د مسايلو پرغیرسياسي کولو تمرکز کوي، چې له امله يې دواړو خواوو ته عام خلک زیانمن کېږي.
عزيزي زیاتوي: « موږغواړو د بيلابېلو موضوعاتو په ځانګړې توګه د سوداګرۍ او ټرانزیټ په برخه کې خبرې اترې ولرو او ټولو هغو مسایلو ته لومړیتوب ورکوو چې د سوداګرۍ په اړه دي او دوه ملتونه د یو شمېر مسایلو له امله زیانمن کېږي، موږ غواړو سوداګري او ټرانزيت چې د دوو هېوادونو ترمنځ تګ راتګ دی؛ له سیاسته جلا کړو او وکولی شو خپل غریب او بې وزله ملت سره مرسته وکړو.»
خو د پاکستان د سوداګرۍ وزارت مرستيال محمد آغا خرم بيا د کابل او اسلاماباد ترمنځ سوداګريزي او ټرانزيټي ستونزې وړې بولي او زياتوي، چې دا ډول ستونزې د ورته ناستو او خبرو له لارې د حل وړ دي.
خرم وايي: « دا زموږ او ستاسې کور دی او په دې کې زموږ وروڼه دي. موږ ته په کار دي، چې دا نور مضبوت کړو. د سوداګرۍ او ټرانزیټ ستونزې دومره لويې نه دي او په ورته ناستو سره د حل وړ دي. موږ نن ناست يوو او تر هغې، چې مسايل حل شوي نه وي نه پورته کېږو.»
د افغانستان او پاکستاني چارواکو ترمنځ د ګډو سوداګريزو او ټرانزيټي ستونزو په اړه خبرې داسې مهال پيلېږي، چې پاکستان د افغانستان موسمي توليداتو پر وړاندې تل د فرضي کرښې پر سر لارې تړلي او د دې ترڅنګ يې د کراچۍ بندر په شمول په واګې او بندر عباس کې د افغان سوداګرۍ پر توکو بار موټر په يوه او بله پلمه تر مياشتو درولي دي.
