Skip to content
افغانستان ته د اسلامي امارت تر راتګ وروسته خصوصي او دولتي پارکونو ته د خلکو ورتګ په زياته کچه کم رنګه شوی و، خو تازه په پغمان کې دا لسګونه کسان چې له ډېریو سره یې کورنۍ هم دي، د تفريح او چکر له پاره راغلي دي.
د تفرېح له پاره راغلي کسان خوښ دي چې امنيتي وضعيت ښه شوی او په ډاډه زړه پارکونو او میله ځایونو ته ځي.
کابل ښار یو تن اوسېدونکی وايي: «نه يې څوک موبايل غلا کولای شي، نه يې کالي غلا کولای شي، د شپې تر شپږو بجو پورې. نه څوک سړی اختطاف کولای شي، عام امنيت ښه ټينګ دی. د دنيا افغانانو ته ډاډ ورکوو چې راشئ! دلته سيل وکړئ ستاسې هېواد دی تاسې سيل وکړئ.»
د کابل ښار یو تن بل اوسېدونکی وايي: «ملګرو ټولو ته اوس پته ولږېده چې فضاء اوس امن ده. دلته خلک خوشاله دي، سوله چې مو غوښته، خو همدا ده که نه. نور ټول خلک خوشاله دي. څوک چې وخت ولري مېله کوي.»
ځینې سيلانيان په دې خوښ و چې له تفريحي ځايونو هغه کسان لرې شوي، چې نشه يي مواد يې استعمالول او خلکو ته یې ستونزې جوړولې.
د کابل ښار یو تن اوسېدونکی وايي: «له حده زياته ستونزه وه، دې چمن کې مخکې شرابيان او چرسيان ګرځېدل. چا په کې خرڅول او چا پکې څښل اوس هېڅوک نشته دی. دا اوس ډېر کم شوي دي. که په پارک کې وي، که په بل ځای کې،هغوی چې چرس څښي اوس خپله هم وېريږي چې طالبان به مو ووهي.»
ياده ولسوالۍ کې د پغمان قصر نظامي مسول وویل، د پارک ساتنه يې مسووليت دی او خلکو ته یې د امنیت ډاډ ورکړ.
د پغمان ماڼۍ نظامي مسوول وايي: «په دې شکل ډاډ ورکو چې يوه ساحه مو خاص فاميلونو ته ځانګړې کړې ده، د هغوی له پاره مسجد، اوبه او تشناب هر ځای جدا دی. کولای شي ټول هېوادوال په آزادانه ډول راشي او سيل وکړي. »
د ياد طالب چارواکي په خبره هڅه کوي، په ياد پارک او نورو اړوندو مېله ځايونو کې خلکو ته اسانتیاوې رامنځ ته کړي او په عايداتي سرچېنو يې هم کار وکړي.
