د سیمې پر کچه هند یو له هغو هېوادونو دی چې په وروستیو کې د افغانستان له سرپرست حکومت سره يې سیاسي او اقتصادي اړیکې پیاوړې کړې دي.
تازه د سرپرست حکومت بهرنیو چارو وزیر مولوي امیرخان متقي د هند له بهرنيو چارو وزیر جی شنکر سره ټیلیفوني خبرې کړې او د دوه اړخیزو اړیکو پر پیاوړتیا، سوداګرۍ او د ډېپلوماټیکو اړیکو د کچې پر لوړولو یې بحث کړی.
د بهرنیو چارو وزارت ویاند ضیا احمد تکل وايي:« په دې مکالمه کې د دوو اړخیزو اړیکو پر پیاوړتیا، تجارت او د ډېپلوماټیکو اړیکو د کچې پر لوړولو خبرې وشوې. د هند د بهرنیو چارو وزیر ښاغلي جی شنکر هم له افغانستان سره د هند اړیکې تاریخي وبللې او زیاته یې کړه چې هېواد به يې له افغانستان سره خپلو همکاریو ته دوام ورکوي او په سیاسي او اقتصادي برخو کې يې پر ګډ کار ټينګار وکړ.»
د دې خبرو اترو په اړه د هند بهرنیو چارو وزیر جی شنکر پر خپله فېسبوک پاڼه لیکلي، په دېه ټیلیفوني مکالمه کې یې د ګډې همکارۍ د لا پراختیا لارې او وسایل څېړلي او ترڅنګ یې د پرمختیايي اړتیاوو په برخه کې د دوامداره ملاتړ ټینګار کړی دی.
شنکر زیاته کړې: « هغه وروستۍ هڅې چې د هند او افغانستان ترمنځ یې د بې باورۍ فضا رامنځته کړې وه، پر درواغو او بې اساسه راپورونو ولاړې وې، موږ یې کلک رد ته ښه راغلاست ووایه. ما د افغان ولس سره زموږ دودیزې دوستۍ او د هغوی د پرمختیایي اړتیاوو په برخه کې د دوامداره ملاتړ یادونه وکړه. موږ د ګډې همکارۍ د لا پراختیا لارې او وسایل هم وڅیړل.»
د سیاسي چارو شنونکي د هند او افغانستان ترمنځ د اقتصادي او سیاسي اړیکو رغېدل مهم بولي.
دوی د افغانستان اقتصادي ځان بسیاینې لپاره وړاندیز کوي چې سرپرست حکومت باید د سیمې او ګاونډیو هېوادونو سره اقتصاد محوره پالیسۍ او متوازن سیاست پرمخ یوسي.
د سیاسي چارو شنونکی معین ګل څمکنی وايي: « افغانستان په سیمه کې متوازنه، بېطرفه او اقتصاد محوره پالیسي غوره کړې. دا پالیسي موږ ته اجازه راکوي چې له ټولو هېوادونو سره تفاهم ولرو، له چا سره په ګډ پیمان کې ونه اوسو. په اوسنیو شرایطو کې دا د افغانستان لپاره تر ټولو ښه لاره ده.»
د سیاسي چارو شنونکی شهسوار سنګروال وايي: « که چېرې دغې سیاسي او ډېپلوماټیکې رغونې ته لاره هواره شي، دا به نه یوازې د افغانستان پر ګټه وي، بلکې د هند پر ګټه به هم وي.»
دا په داسې حال کې ده چې د ریاست الوزرا اقتصادي مرستیال ملا عبدالغني برادر اخوند وړ مه ورځ د روسیې په کازان کې د روسیې او اسلامي نړۍ په ۱۶م نړیوال کنفرانس کې د افغانستان او کوربه هېواد سره د اقتصادي همکاریو پراختیا په اړه خبرې وکړې.
د شنونکو په باور، دا هڅې د افغانستان د اقتصادي ثبات او پراختیا لپاره خورا موثرې او مثمرې واقع کېدای شي.
