د افغانستان لپاره د روسیې ځانګړي استازي ضمیر کابلوف ویلي، د روسیې فارمټ ګډونوال هېوادونه د اسلامي امارت پر رسمیت پیژندلو غور کوي او په خبره یې ملګري ملتونه هم پر ورته تګلاره کار کوي.
کابلوف زیاته کړې:« یو شمېر هېوادونو پر ځینو مواردو لکه د افغانستان له خاورې نه د چا پر ضد کار نه اخېستل، د مخدره توکو پر ضد مبارزه او داسې نورو مواردو باندې ټینګار کاوه،چې د هغو په تړاو هم طالب استازو ډاډ ورکړی او پر جزئیاتو به یې نور کار هم وشي.»
کابلوف ویلي، د ملګرو ملتونو تخنیکي کمیټه پر افغانستان د بندیزونو پر لرې کیدو غور کوي او عملا د تخنیکي چارو پر چټکتیا کار پيل شوی دی.
اخوا د سیاسي چارو یو شمېر شنونکي بیا وايي، که د مسکو فارمټ ناستې ګډونوال هېوادونه د افغانستان اسلامي امارت پر رسمیت وپېژني؛ په سیاسي او اقتصادي وضعیت به مثبت اغیز وکړي.
دوی وايي، د دې لپاره چې افغانستان وکولی شي خپلې پیسې او پاسپورت چاپ کړي، باید له حقوقي خلا څخه نجات پیدا کړي او لازمه ده چې افغانستان د یو هېواد په توګه وپيژندل شي.
شنونکی طارق فریادي وايي:«که د مسکو فارمټ ناستې ګډونوال هېوادونه په راتلونکو دوه یا درې میاشتو کې د افغانستان حکومت پر رسمیت وپېژني،یو نیک کار دی،چې باید افغانستان له حقوقي خلا نجات پیدا کړي.»
خو ځینې نور بیا د نوي حکومت د رسمیت پيژندو لپاره د ملګرو ملتونو او امریکا له تور لیست نه د یو شمیر طالب مشرانو د نومونو اېستل مهم بولي او ټنیګار کوي،چې د نړیوال مشروعیت ترلاسه کولو لپاره دې اسلامي امارت د نړیوالو له لوري وړاندې شوي شرایط ومني.
شنونکي دا ویره هم لري، که اسلامي امارت پرر رسمیت ونه پېژندل شي،ښایي افغانستان ته نورې وسله والې ډلې لار پيدا کړي.
شنونکی خلیل احمد نادم وايي:«که پر رسمیت ونه پېژندل شي،نو هره وسله واله ډله به افغانستان ته راځي،چې د نړیوالو له همکارۍ پرته به یې مخنیوی ستونزمن وي.»
شنونی احمد خان اندړ وايي:« نړۍ باید پرېنږدي،چې افغانستان له یوه ناورین سره مخ شي او موږ باوري یو،چې د افغانستان اړیکې به له نړۍ سره ښې شي او د اسلامي امارت پر رسمیت پېژندلو ته ډیرې ښې لارې هوارې شي.»
افغانستان لپاره د روسیې ځانګړي استازي ضمیر کابلوف ویلي، د روسیې فارمټ نږدې ټولو ګډونوالو پر دې هوکړه کړې،چې د اسلامي امارت په رسمیت پیژندلو باندې به کار وکړي.
