کابل کې پرلپسې درې چاودنو له پنځوسو زیاتو کسانو ته مرګ ژوبله اړولې.
د پنجشنبې په سهار د کابل ښار په نهمه او شپاړسمه حوزه کې پرله پسې درې چاودنې وشوې، چې ماشومانو او ښځو ته یې هم مرګ ژوبله اړولې ده.
طالبانو یواځې د هغه موټر بم برید مسولیت په غاړه اخیستی چې پر بهرنیو ځواکونو شوی دی.
لومړی برید د شپاړلسمې حوزې اړوند ملي بس څلور لارې تر څنګ وشو، چې موخه یې د کانونو وزارت مامورین وو او هغوی ته یې مرګ ژوبله اړولې.
د عملې هغه کاسټر موټر یې په نښه کړی چې، د وزارت مامورینو کې مېرمنې او د هغوی کوچني ماشومان هم پکې سپاره وو.
دویمه چاودنه هم په همدې ځای کې تر سره شوې چې مرګ ژوبله یې له ځانه سره درلوده.
طالبانو ددغو دوو بریدونو مسولیت ندی منلی.
دریم برید بیا په نهمه امنیتي حوزه کې شوی،چې طالبانو یې پړه اخستې او د پراخې مرګ ژوبلې اړولو ادعا یې کړې.
طالبان وايي برید یې پر بهرنیو ځواکونو کړی چې ګڼ شمیر ځواکونو ته یې مرګ ژوبله اړولې ده.
خو کورنیو چارو وزارت بیا د ټولو بریدونو پړه په طالبانو اچولې.
کورنیو چارو وزارت داسې ویلي ((طالبانو د کابل ښار په شپاړسمه او نهمه امنیتي حوزو کې یو ځل بیا ملکی وګړي په نښه کړل، په دغو بریدونو کې یوولس تنه وژل شوي او پنځه څلوېښت تنه نور ټپیان دي. وژل شویو کې پنځه ښځې او یو ماشوم شامل دی. ))
دغو بریدونو کې ټول یوولس تنه وژل شوي او پنځه څلویښت تنه نور ټپیان شوي دي.
وژل شويو کې پنځه ښځې او یو ماشوم هم شامل دی.
په کابل کې یو ځل بیا بریدونو داسې وخت زور واخست چې د سولې خبرې هم ګرمې روانې دي او پوره خوشبیني یې زیږولې.
