Skip to content
په کابل کې د چهار شنبې پر ورځ د « ۱۴۰۰ کال د کب پر ۱۸ مه» یو شمېر ښځینه فعالانو د مارچ اتمې یا د ښځو یووالي نړیوالې ورځې په مناسبت ناسته وکړه.
په ناسته کې ښځینه فعالانو له اسلامي امارته غوښتنه وکړه،چې د ښځو ستونزو د حل لپاره یوه ځانګړې اداره جوړه کړي.
د افغان ښځو سولې او ازادۍ سازمان مشره جمیله ساپۍ وايي:« د دې لپاره چې افغانستان کې د ښځو لپاره خوندیتوب، امنیت، کار او زده کړو زمینه برابره شي او ښځې چې اوس له کومو ستونزو سره لاس او ګریوان دي، د دې اړتیا ده،چې یوه ځانګړې اداره جوړه شي. »
د ناستې ویناوالو د ښځو وضعیت په تړاو اندېښنې څرګندې کړې او په خبره یې په تېرو شپږو میاشتو کې ډېری ښځې بې روزګاره شوي او خپلو حقونو ته پوره لاسرسی نه لري.
په ورته وخت کې دوی له اسلامي امارت څخه وغوښتل،چې د ښځو وزارت بېرته رامنځته کړي.
د ښځو حقونو فعاله تورپیکۍ مومند وايي:« اسلامي امارت دې اوس له ځانه دا ابتکار وښي او ښځو ته دي حقوق ورکړي. د ښځو چارو وزارت دې بېرته فعاله کړي.»
د اسلامي امارت تر واکمنۍ لاندې دا لومړی ځل دی،چې افغانې ښځې د مارچ اتمه یا د ښځو یووالي نړیواله ورځ نمانځي.
اسلامي امارت هم د مارچ اتمې په مناسبت خپره کړې خبرپاڼه کې ویلي، د ښځو حقونو، ستونزو حل او تعلیم ته ژمن دي او د کار اجازه ورکوي.
