د افغانستان لپاره د روسیې سفیر ډیمتري ژیرنوف، د ریاست الوزرا له سیاسي مرستیال مولوي عبدالکبیر سره په لېدنه کې پر بېلابېلو مسایلو خبرې کړي.
ارګ پر خپله اېکس پاڼه لیکلي، د روسیې سفیر د افغانستان له سرپرست حکومت سره د اړیکو پراختیا غوښتنې ترڅنګ، د دوه اړخیزو اړیکو پراختیا او تعامل د سیمې د ټیکاو او اقتصادي ودې په ګټه بللې او په بېلابېلو برخو کې یې د هر راز همکارۍ ډاډ ورکړی.
د ارګ په خبره، دیمتري ژیرنوف په نړیوالو ناستو کې د سرپرست حکومت د نظر تائید ترڅنګ، د مسکو په نوښت د تاتارستان په پلازمېنه کازان کې راتلونکې نړیواله ناسته کې سرپرست حکومت ته د ګډوڼ بلنه ورکړې.
ارګ زیاته کړې: « روسیه په بېلابېلو برخو کې له افغانستان سره همکارۍ ته چمتو ده او غواړي د دواړو لورو ترمنځ اړیکې لا وغوړېږي. د اسلامي امارت او روسیې د دوه اړخیزو همکاریو او تعامل پراختیا کولی شي د سیمې ثبات او د افغانستان له اقتصادي پیاوړتیا سره مرسته وکړي.»
په دې ناسته کې د ریاست الوزار سیاسي مرستیال مولوي عبدالکبیر له مسکو سره د کابل اړیکې د دواړو خواوو په ګټه او د سیمهییز ثبات او پرمختګ لامل ګڼلي.
د دې ترڅنګ نوموړي له روسي پانګه والو په افغانستان کې د پانګونې غوښتنه کړې.
د سیاسي چارو شنونکي وايي، له روسیې سره د اړیکو رغښت کولی شي له سیاسي انزوا د افغانستان په رااېستلو کې مرسته وکړي.
دوی وايي، په داسې حال کې چې روسیه دامهال په اوکراین کې له لویدیځ سره په غیرمستقیمه جګړه کې ښکېله ده، د افغانستان له حکومت سره د ښو اړیکو د ساتلو له درکه دغه هېواد غواړي د سیمې هېوادونه د لویدیځ په مقابل کې واحد بلاک ته راوبولي.
د سیاسي چارو شنونکی خلیل احمد نادم وايي: « روسیه په نړیواله سطحه له افغانستانه سیاسي ملاتړ کولی شي او په اقتصادي برخه کې هم کولی شي مرسته وکړي. بله دا چې د منځنۍ اسیا هېوادونه له افغانستان سره هم سرحد دي دا هم د روسیې د امنیت لپاره ډېر مهم دي.»
د سیاسي چارو شنونکی جنت فهیم چکري وايي: « د افغانستان اسلامي امارت دې له ګاونډیو، سیمې او هغو هېوادونو سره چې د سیاست په لومړۍ کرښه کې دي، لکه هغه پنځه هېوادونه چې د ملګرو ملتونو د سازمان د امنیت شورا غړي دي؛ له دوی سره د متوازنو اړیکو پاللو هڅه وکړي.»
د شنونکو په باور روسیه په افغانستان کې سیاسي ټیکاو د سیمې او ځان په ګټه ګڼي او له همدې کبله دا څوم ځل دی چې د افغانستان په تړاو ناسته جوړوي.
د دوی په خبره، روسیه په دې لټه کې ده، چې له اوسني حکومت سره د اړیکو له لارې د سیمې اوضاع کنټرول او له دې لارې د منځنۍ اسیا د هېوادونو ثبات وساتي.
د سیاسي چارو شنونکی شېرحسن حسن وايي: « نړیوالې اړیکې او د هېوادونو ترمنځ اړیکې خیراتي نه وي، دا په متقابلو ګټو ولاړې وي او د روسیې او افغانستان اړیکې هم له دغې قاعدې وتلې نه دي، دا چې روسیه له افغانستان سره د ښو اړیکو غوښتونکې ده، په نړیوالو صحنو او ډګرونو کې افغانستان په پلوۍ خبرې کوي او لابي ورته کوي، لامل یې دا دی چې روسیه د نړیوال زبرځواک په توګه سیمه کې ډېرې ګټې او لېوالتیا لري، لومړی خو دا چې د منځنۍ اسیا هېوادونه د تاجکستان، ازبکستان، ترکمنستان، کرغستان او قزاقستان په شمول چې د پخواني شوري اتحاد د جمهوریتونو په توګه له روسیې سره په نږدې اړیکو کې پاتې شوې دي؛ نو روسیه نه غواړي چې دغه اړیکې له لاسه ورکړي.»
واک ته د سرپرست حکومت له رسېدو وروسته د لویدیځو هېوادونو خلاف، روسیه په سیمه ییزه او نړیواله کچه هغه هېواد دی چې له سرپرست حکومت سره یې نږدې اړیکې پاللي او د افغانستان په محوریت په هره جوړه شوې سیمه ییزه او نړیواله ناسته کې یې د سرپرست حکومت خوا نیولې.
خو له دې هرڅه سره سره دغه هېواد په رسمي ډول افغانستان لاهم په رسمیت نه دی پېژندلی او په ظاهره دغه څه یې د ټولګډونه حکومت د رامنځته کېدا ترڅنګ د ځېنو نوروغوښتنو تر پورې کېدا ځنډولي دي.
