د خوست شېخ زاید پوهنتون ژورنالېزم پوهنځي زده کړیالان له سرپرست حکومته غواړي، چې د رسنیو او خبریالانو په وړاندې دې د یوې منظمې تګلارې د جوړولو کارونه ژر تر ژره پای ته ورسوي، څو د دوی په خبره په دې برخه کې رامنځته کېدونکې ستونزې پای ته ورسیږي.
د ژورنالیزم پوهنځي یو تن زده کړیال اجمل ارمان وايي:« دولت ته دا پکار ده چې د رسنیو لپاره یو قانون جوړ کړي، ترڅو د هغه له مخې خپل نشرات ترسره کړي.»
اخوا ځینې نور بیا له دې سربېره له سرپرست حکومته اطلاعاتو ته د لاسرسي په برخه کې هم د اسانتیاوو پر رامنځته کولو ټینګار کوي.
دوی دغه راز د ځينو رسنيو د احتمالي تړل کېدو مخنيوي په موخه د سرپرست حکومت له لوري د يوه منظم ميکانېزم پر اساس د رسنيو مالي ملاتړ هم اړين بولي.
د ژورنالیزم پوهنځي یو تن زده کړیال اجمل وردګ وايي:« له حکومته مو تمه دا ده چې رسنیو ته صلاحیت ورکړي چې حقاق خپاره کړي او ملاتړ یې وکړي.»
په ورته مهال د پوهنتون استادان بیا په هېواد کې د رسنیزو فعالیتونو لپاره د سرپرست حکومت لخوا د یوې ځانګړې پالیسۍ پر جوړولو ټینګار کوي.
د دوی په خبره د یوې مشخصې پالیسۍ له رامنځته کیدو وروسته ممکنه ده چې د رسنیو پر وړاندې شته خنډونه تر ډېره پای ته ورسیږي.
د شېخ زاید پوهنتون استاد محمد خان نیازی وايي:« حکومت باید رسنیو یوه ځانګړي ملي اسلامي او افغاني پالیسي جوړه کړي. له بده مرغه دا تر اوسه پورې زموږ هېواد کې نیمګړې ده. همدارنګه هغه رسنۍ او په ځانګړي ډول سیمه ییزې رسنۍ چې کار کوي هغه باید یوه ځانګړي ملي او مسلکي پالیسي ولري.»
د اسلامي امارت ویاند ذبیح الله مجاهد بیا وايي، د رسنیو ازادۍ ته ژمن دي او که رسنۍ بې بنسټه مالومات نشر نه کړي نو په دې برخه کې کوم محدودیت نشته.
د مجاهد په خبره د رسنیو لپاره د چمتو شوي قانون چارې بشپړې شوي او یوازې د مشرتابه لخوا توشیح ته په تمه دي.
په هېواد کې د رسنیو د کار په وړاندې د ځانګړې قانون د تصویب دا غوښتنې داسې مهال کیږي چې له دې وړاندې هم د خبريالانو يو شمېر ملاتړو بنسټونو له حکومت غوښتې و چې د رسنيو قانون بايد ژر تر ژره تصويب شي ځکه د دوی په وينا د قانون په نه شتون کې د رسنيو او خبريالانو د ستونزو هواری له ډېرو ستونزو سره مخ ده.
