چین له افغانستان سره مرسته کوي چې څنګه کېدای شي د کرونا ناروغۍ مخنیوی وکړي.
کابل کې د چین سفیر وانګ یوو له ولسمشر محمد اشرف غني سره په لیدنه کې ویلي، د افغانستان د بهرنیو چارو وزارت څخه یې یو لیست ترلاسه کړی او هڅه کوي هغه تجهیزات چې د کرونا ویروس مخنیوي په خاطر ورته افغانستان اړتیا لري، برابر کړي.
د چین سفیر ویلي، همدا چې بیا ځلي د چین ارومچي ښار ته د افغانستان الوتنې پیل شي، د افغانستان وړانديز شوي تجهیزات به راولېږدول شي.
دغه راز د چین سفیر ویلي، د هېواد متخصصین یې چمتو دي چې د کرونا ناروغۍ د مخنیوي برخه کې خپلې تجربې له افغانستان سره شریکې کړي.
ولسمشر غني ویلي، غواړي د کرونا ویروس سره د مبارزې په موخه طبي تجهیزات له خپلې ملي بودجې وپیري او د دغو تجهیزاتو لیست هم چمتو شوی دی.
اشرف غني ویلي، غواړي د چین له تجربو زده کړه وکړي، چې په کرونا اخته ناروغانو د درملنې لپاره د کلینیکونو د دقیقو او سمو ودانیو جوړولو په برخه کې چټک اقدام وکړي.
