چین وايي، دوی به طالبان د سیاسي ځواک په توګه وپيژني.
د چین سفیر ویلي طالبانو ته باید اجازه ورکړل شي چې د افغانستان په سیاسي حل کې سیاسي رول ولوبوي.
بلخوا د افغانستان د سولې شورا د دارالانشا رییس عمر داودزی نن چین ته رسیدلی او د سفر یوه موخه یې دا ده چې افغان حکومت او طالبان مخامخ خبرو ته کینوي.
په قطر کې د طالبانو او امریکایانو تر منځ د ګرمو خبرو را دیخوا د افغانستان د سولې شورا بیا د افغان حکومت او طالبانو تر منځ د مخامخ خبرو لپاره د سیمې په هېوادونو تکیه زیاته کړې.
خو تازه په پاکستان کې د چین سفیر ویلي چې دوی به طالبان د سیاسي ځواک په توګه وپيژني.
په پاکستان کې د چین سفیر یو جینګ داسې ویلي (( چين به طالبان د یوه سياسي ځواک په توګه و پېژني ځکه ، چې هغوی اوس د افغان سياسي پروسې يوه برخه ده او هغوی یو شمېر سياسي اندېښنې لري. هغوی ته باید اجازه ورکړل شي ، چې د افغانستان په سياسي حل کې قانوني رول ولوبوي.))
سفیر دغه راز زیاته کړې چې دوی په طالبانو فشار راوستی چې د سولې په پروسه کې ور ګډ شي.
یو جینګ داسې ویلي (( که ممکنه وي چين کولی شي په طالبانو فشار راوړي ترڅو د سولې پروسه کې ور ګډ شي. افغانان له تېرو ۴۰ کلونو د جګړې قرباني دي هغوی حق لري ،چې سوله او ټيکاو کې ژوند وکړي.))
سولې عالي شورا او په ټوله کې افغان حکومت په دې هڅه کې دی چې طالبان له دوی سره مخامخ خبرو ته کیني.
داودزي له پاکستاني چارواکو سره هم په دې اړه خبرې کړې وې تر څو طالبان له دوی سره مخامخ خبرو ته کینوي خو پاکستان د تېر په څېر په دې برخه کې هم ژمنه کړې.
