د افغانستان په اړه د ملګرو ملتونو امنیت شورا په وروستۍ درې میاشتنۍ ناسته کې چې د جون په اتمه ترسره شوه، په کابل کې د دې سازمان سیاسي استازولۍ(یوناما) سرپرستې په افغانستان کې ثبات د ډاډ وړ وباله.
د جورجیت ګانیون په خبره، د اسلامي امارت پر وړاندې وسلهوال مخالفتونه او سیاسي ننګونې پای ته رسېدلي.
د یوناما سرپرستې دغه راز ویلي: « په ښکاره توګه افغانستان د اوسنيو چارواکو تر واکمنۍ لاندې با ثباته دی. د هېواد پر قلمرو او اداري جوړښتونو یې کنټرول پیاوړی شوی او د واکمنۍ پر وړاندې یې کوم وسلهوال تحرک یا سیاسي ننګونه وجود نه لري او چارواکي هم د امنیت او ثبات پرمختګ ستره لاسته راوړنه بولي.»
د ملګرو ملتونو امنيت شورا په دې ناسته کې د ځينو هېوادونو استازو د اسلامي امارت پر وړاندې د تعامل دریځ په یو شمېر شرایطو پورې تړلی وباله، خو د روسیې او چین په ګډون د یو شمېر نورو هېوادونو استازو بیا د روانو اقتصادي او بشري بحرانونو د حل په موخه له اسلامي امارت سره تعامل اړین یاد کړ.
غونډې ته د چین استازي ویلي، د اسلامي امارت او نړیوالې ټولنې ترمنځ د تبادل او همکارۍ اړیکې غښتلې شوې دي او په ځانګړي ډول د سیمې له هېوادونو سره د تعامل کچه پیاوړې شوې ده.
په ملګرو ملتونو کې د چین استازي فو کونګ ویلي: « افغانستان په ټولیزه ډول اوس مهال باثباته دی، خو ننګونې چې وضعیت یې سخت او پېچلی کړی، د بشري مرستو پرمختګونه او د ترهګرۍ پر وړاندې مبارزه ده. دا ډېره مهمه ده چې د عملي او ریښتیني تعامل روان بهیر دوام وکړي.»
د چین ترڅنګ د روسیې استازې هم د نړیوالې ټولنې او اسلامي امارت ترمنځ د اړیکو پر رغولو ټینګار کړی او دغه چاره یې د افغانستان مخ پر ودې امنيتي او اقتصادي وضعیت لپاره مهم اقدام یاد کړی.
په ملګرو ملتونو کې د روسیې دایمي استازي مرستيالې انا اوستیګنیوا ویلي: « لا هم اړینه ده چې د واکمنو چارواکو او نړیوالې ټولنې ترمنځ د تعامل یوه باوري فضا رامنځته شي، عملي او ریښتینې اړیکې ورغول شي او په حقیقت کې هغلته د ملګرو ملتونو حضور یو مهمه برخه ده.»
د یادونې وړه ده چې د ملګرو ملتونو په دې ناسته کې تر ډېره د هېوادونو تمرکز د افغانستان پر بشري او اقتصادي وضعیت څرخېده چې ګڼو هېوادونو د افغانستان بشري وضعیت د خرابولي عمده لاملونه د اقلیمي بدلون ناوړه اغېزې، له ګاونډویو هېوادونو څخه د میلیونونه کډوال اخراج او طبيعي پېښې بللې دي.
