کونړ کې وسله وال پوځ د طالبانو او داعش پر ضد عملیات کړي.
د کونړ ځينو سیمو کې د طالبانو او داعش ترمنځ له نښتو سره یو ځای ملي دفاع وزارت عملیات پيل کړي چې په خبره یې له ځينو سیمو یې دا ډلې تيښتې ته اړ کړي دي.
چپې دره کې طالب او داعش وسله وال په جګړه و چې د عملیات پرمهال مزار درې ته تښتیدلي دي. د کونړ ځایي چارواکي وايي، تازه نښتو کې پنځه دیرش داعش او شپاړس طالب وسله وال وژل شوي دي.
د کونړ چپه دره ولسوالۍ کې د طالبانو او داعش پرضد د ملي دفاع وزارت عملیات د دواړو ډلو پرضد شوي چې د ملي دفاع وزارت د مالوماتو له مخې داعش ډله اړ شوې چې له چپې درې څخه مزار درې ته وتښتي.
د ملي دفاع وزارت مرستیال ویاند زبیر عارف داسې وویل (( د کونړ چپې دره کې د دواړو وسله والو ډلو تحرکات له مخکې روان وو، دوی به خپلو کې هم جګړې کولې، خو اوس افغان ځواکونو د دوی پر ضد عملیات وکړل، چې دواړه ډلې یې ځپلې دي، باید ووایم چې په دغې سیمه کې ځايي اوسېدونکو هم د دواړو ډلو پر ضد وسله پورته کړې او افغان ځواکونو سره یې اوږه په اوږه د دوی پر ضد جګړه کړې ده.))
د کونړ د ځایي چارواکو مالومات ښيي چې تازه دې دواړو ډلو خپلمنځي نښته کې یو بل ته درنه مرګ ژوبله اړولې چې ۳۵ داعش او ۱۶ طالب وسله وال پکې وژل شوي دی.
پوځي شنونکي باور لري چې په کونړ کې د داعش حضور او فعالیت شمالي ولایتونو ته د خطر زنګ دی.
کابل خان تدبیر داسې وايي (( هڅې ددې لپاره روانې دي، چې کونړ، نورستان او بدخشان ولایتونو کې یوه مشخصه لاره دداعش لپاره جوړه کړي، تر څو ددوی اکمالات چې د پنجاب د بلې پروژې چې له مجاهدینو او طالب وروسته یې تطبیقوي زه ددې اصلي جوړونکی پنجاب بولم او زه فکر کوم چې دوی ددې تلاش کوي چې د افغانستان شمال ته لاره خلاصه کړي او پروژه تطبیق کړي.))
د داعش ډلې تمرکز په ختیځ کې په ننګرهار ولایت و چې اوس دا ډله د ننګرهار زیاتو ولسوالیو کې یا ځپل شوې او یا یې نورو سیمو ته تېښته کړې، خو اوس داسې ښکاري چې د کونړ ځينو سیمو کې د پټنځایونه او خوندي ځایونو په لټه کې دي.
دفاع وزارت وایي، ځایي خلک ورسره همکاري کوي چې دا ډله له پراخ حضور او فعالیت وغورځوي.
