پاکستاني ځواکونو وړمه ورځ په هغو خېمومخامخ ډزې وکړې، چې له تېرو ۷ میاشتو راپدېخوا په کې اعتراض کوونکي د پاکستان له حکومته د خپلو غوښتنو په اړه غږ پورته کوي.
اعتراض کوونکي د پاکستاني ځواکونو پروني بريد په اړه وايي، اعتراض کوونکي د غرمې ډوډۍ ته تللي وو او ملېشه ځواکونو له فرصته په استفادې د پرلت پر کمپ برید وکړ او خېمې یې وروسوځولې، چې په لړ کې یې څلورو کسانو ته مرګ ژوبله واوښته، له ۲۰ ډېر ټپیان شول او د ۴۰ شاوخوا پرلت کوونکي لادرکه شول.
چمن کې د پرلت ویاند عبدالصادق اڅکزی وايي: « پاکستاني رسنیو زموږ خبرې هېڅ خپرې نه کړې پاکستانۍ ورځپاڼې او رسنۍ د پوځي قیادت تر تصرف لاندې دي، زموږ غږ څوک نه اوري. موږ ریاست چلنجوو چې کندهار او کوټه دوه وروڼه دي او دا زموږ د مشترکې سوداګرۍ د اوو میاشتو درنه ناسته ده.»
د پرلت مسوولین وایي، د پاکستان حکومت د خپلو کړیو ژمنو پر خلاف عمل کړی او لا يې هم نه ده منلې، چې پر چمن لار به د خلکو تګ او راتګ د پخوا په څېر پر تذکرې او شناختي کارډ کېږي.
خلکو په پرلت کوونکو د پاکستاني ځواکونو د وړمې ورځې بريد له امله په چمن کې کاربندیز کړی او د چمن-کوټې لار یې هم تړلې ده.
دوی وایي، پرلت ته تر هغه دوام ورکوي څو د دغو برید کوونکو پر ضد قانوني چلن نه وي شوی.
اڅکزي زیاته کړې: « په اصل کې اووه میاشتې کېږي چې د چمن پرلت کوونکو یوازینۍ غوښتنه همدا ده چې پر پاک – افغان باډر په ۱۰۰ کیلو مټره کې د کندهار او کوټې خلک تګ راتګ پر شناختي کارډ او افغاني پېژندپاڼه باید وکړي؛ له بده مرغه حکومت داسې پرېکړه وکړه چې له اوو میاشتو راهیسې په کې ټول وطن خوار شو، سوداګري په کې له منځه لاړه او د چمن او کندهار خلک په کې ډېر زیانمن شول، موږ څلور میاشتې او ۱۰ ورځې ټرانسپورټي اعتراض کړی و.»
د ۲۰۲۳م کال د اکټوبر له ۲۱مې راهیسې لسګونه کسانو د چمن سپین بولدک پر لاره په ازاد تګ راتګ د پاکستان د محدودودیتونو پر ضد پرلت پیل کړی، چې له دې سره وړمه ورځ په چمن کې د پاکستاني ځواکونو په ډزو کې څلور کسان ووژل شول او وروسته له دې پېښې په همدې دې سيمه کې يوه ولسي غونډه جوړېږي او په دې جرګه کې به د دغو کسانو پر وژل کېدو او ټپي کېدو او د چمن- سپين بولدک ترمنځ د ويزې د ورکړې پر لارو چارو خبرې وشي.
