د پروان ولایت مرکز چاریکارو ښار اړوند د دیارلسمې پارچې سیمه کې د اوبو رسولو یوه ستره شبکه جوړه او ګټه اخستنې ته وړاندې شوه.
چارواکي وايي، د اوبو رسولو د دې شبکې ټول لګښت ۸۸ ميليون افغانۍ دی چې د اوس لپاره ترې دوه زره کورنۍګټه اخلي او په راتلونکي کې به پنځه زره کورنيو ته د اوبو رسولو ظرفيت ولري.
د اوبو رسولو دولتي شرکت اجرایيه رییس غلام رحمان کاظم وايي: « دا پروژه د اسلامي امارت له ۸۸ میلیونه داخلي بودیجې څخه تمویل شوې او خلکو ته د څښاک پاکې اوبه برابروي. په پلان کې لرو چې د دې ښار پاتې کورنیو ته هم د اوبو خدمات ورسوو.»
د اوبو رسولو دولتي شرکت چارواکي دغه راز وايي، د چاریکار ښار په يوه بله سیمه کې هم د اوبو رسولو د ورته شبکې جوړولو پلان لري.
د دوی په خبره، دا شبکه چې لا یې تدارکاتي چارې روانې دي، تر ۱۰۰۰ مترو به اوږدوالی ولري او سلګونه کورنیو ته به د اوبو رسونې خدمات وړاندې کړي.
د اوبو رسولو دولتي شرکت تخنیکي ریيس ندي الله نیازی وايي: « په راتلونکي کې موږ د چاریکارو ښار د ۱۲ پارچې لپاره د اوبو رسولو پلان لرو. په دې پروژه کې به هم د ۱۰۰۰ کورنیو لپاره پاکې اوبه برابرې شي. د دې پروژې د سروې او ډیزاین چارې بشپړې شوې او تدارکاتي چارې یې جریان لري.»
د سیمې اوسېدونکو هم د اوبو رسولو بشپړې شوې پروژې په تطبیق کې ونډه درلوده او د پايپ غځولو لپاره یې له ۶۶ زره متر مکعب زیاته ساحه کیندلې ده. دغه راز یې له ۴۷ زره متر مکعب څخه زیاتې کیندل شوې ساحې بېرته ډکې کړې او د ۲۹۰۰ اوبو اتصال یا کنکشنونو نصب یې پر غاړه درلود.
