Skip to content
د کندهار ولایت کرنې ریاست مسوولین وايي، په دې ولایت کې شااوخوا۴۰ قلمه طبي بوټي شته، خو په خبره په غير قانوني ډول د حاصلاتو ټولولو له امله یې ډېره برخه د ورکېدو له ګواښ سره مخ ده.
د یاد ریاست د طبیعي سرچېنو امر حامد سادات وايي، شیرین بویه، خوږولې او هنجه د طبي بوټو له هغو ډولونو څخه دي،چې د هند په ګډون یو شمېر نورو هېوادونو کې يې ښه بازار او لوړ نوم درلود، خو اوس یې نسل د ورکېدو له ګواښ سره مخ دی.
سادات زیاته کړه:« د کندهار هغو سیمو کې چې طبي بوټي پهع کې د ورکېدو په حال کې دي، تېرو کلونو کې په کې دغه بوټي په پراخه توګه پیدا کیدل. د دغو بوټو نسل ځکه له ګواښ سره مخ دی، چې راټولونه یې په نامسلکي توګه کیدله.»
سادات وايي، د کندهار طبي بوټي لوړ نوم لري، که په معیاري بڼه یې ساتنه وشي دا وړتیا لري چې د هند تر څنګ یې ګڼو نورو هېوادونو ته صادرات وشي.
په کندهار کې د يوناني ډاکترانو ټولنې غړي او د طبي بوټو سوداګر هم وايي، پخوا په دغه ولايت کې په لوړه کچه بېلابېل طبي بوټي پيدا کېدل، خو اوس د خپلسري ټولونې له امله لږ شوي.
دوی وایي، له دې امله اړ شوي،چې په یوناني درملو کې کارېدونکي بوټي له نورو هېوادونو په څو چنده لوړ قیمت وپلوري.
د یوناني ډاکټرانو د ټولنې غړي کبیر غفوري وايي:«موږ اوس اړ شوي یو،چې د خپلو یوناني درملو لپاره له نورو هېوادونو طبي بوټي راوړو، ځکه دلته اوس نه پیدا کېږي.»
د کندهار په ګډون په یو شمېر نورو ولایتونو کې بېلابیل طبي بوټي شته، خو په ځانګړې توګه شیرین بویه او هنجه د افغانستان له شمالي ولایتونو بدخشان، تخار، بلخ او سمنګانه لاس ته راځي.
تر دې وړاندې د کرنې وزرات ویلي وو، چې ځینو ولایتونو کې یې یو شمېر سیمې چې طبي بوټي یې له ګواښ سره مخ وې، قرنطین کړې وې او لا هم دغه لړۍ روانه ده.
طبي بوټي د افغانستان د صارداتو په نوملړ کې پنځم ځای لري،چې ډېره برخه یې هند هېواد ته لېږل کېږي.
