د ټرانسپورټ او هوايي چلن وزارت، مالیې وزارت او د افغان پُسټ شرکت ترمنځ په باور وړونکو ټرانزیټي موټرو کې د جي.پي.اېس سیسټم د نصبولو په موخه تړون لاسلیک شو.
چارواکي وايي، دا سیسټم یا هم د ځیرک قلف سیسټم به په ټولو هغو بار وړونکو موټرو کې ځای پر ځای شي چې د افغانستان له لارې ګاونډیو هېوادونو ته ټرانزیت کوي.
د دوی په خبره، دا سیسټم به هغه مهال له موټرو بېرته لرې کېږي چې کله له افغانستان څخه وځي.
د ټرانسپورټ او هوايي چلن وزارت د تدارکاتو رییس حبیبالرحمان طلحه وايي: « د جي.پي.اېس دا سیسټم په ټرانزیټي او بار وړونکو موټرو کې لګول کېږي او له دې وروسته به د سیسټم اړوند شرکت او نورې ادارې ورسره همکاري کوي. دا سیسټم په هر هغه بار وړونکي موټر کې لګول کېږي چې زموږ خاورې ته راننوځي؛ کله چې همدا موټر بېرته زموږ له خاورې وځي، سیسټم به ترې خلاصېږي.»
په باور وړونکو موټرو کې د دې سیسټم له ځای پر ځای کولو سره به ټول سوداګر خپل توکي له نږدې څاري، په سوداګریزو توکو کې به د لاسوهنې مخنیوی وشي او همدا راز به د توکو د غلا مخه هم ونیول شي.
د دولتي شرکتونو عمومي رییس احمدجان بلال وايي: « ځیرک قلفونه د تجارتي اموالو متشبث ته وړتیا ورکوي چې د خپلو توکو له کره ځای څخه خبر ترلاسه کړي. له دې سره نه یوازې د لارۍ د تګ مسیر او د درېدلو ځای په ګوته کوي بلکې د انحراف په صورت کې د اموالو له غلا څخه مخنیوی کوي.»
چارواکي وايي، د دې سیسټم په رامنځته کولو سره د بهرني ټرانزیټ په برخه کې پر افغانستان باور زیاتېږي او د شفافیت رامنځته کېدو ترڅنګ به د سوداګریزو توکو خوندیتوب یقیني شي.
د ټرانسپورټ او هوايي چلند وزارت د تدارکاتو رئیس حبیب الرحمان طلحه وايي: « په کوم موټر کې چې دغه جي.پي.اېس سیسټم نصب شوی وي، د تجارتي توکو او موټر خاوندانو ته ښکاري چې مال او موټر یې په کوم ځای کې دي.»
د مالیې وزارت اداري مرستیال دوست محمد مخلص وايي: « د بهرني ټرانزیټ په برخه کې به د باور کچه لوړه شي، د سوداګریزو توکو خوندیتوب به یقیني شي، په چارو کې به پوره روڼتیا او چټکتیا رامنځته او د کار وخت به په منظم ډول کنټرول شي. د جي.پي.اېس دا سیسټم له داسې ځانګړتیاوو برخمن دی چې په ټرانزیټي محموله کې د هر ډول لاسوهنې مخه نیسي.»
طلحه وايي، د جي.پي.اېس سیسټم په نصبېدو سره به د موټرونو سرعت هم کنټرول شي او په دې کار سره به د زیات سرعت له امله رامنځته کېدونکې ټرافیکي پېښې کمې او د مرګ ژوبلې مخنیوی وشي.
هغه زیاتوي: « د جي.پي.اېس د دې سیسټم په وسیله د موټرو سرعت هم کنټرولېږي او په دې سره به د چټک سرعت له امله رامنځته کېدونکې ټرافیکي پېښې او د مرګ ژوبلې کچه هم ټیټ شي.»
په همدې حال کې، د مالیې وزارت وايي هڅه کوي چې افغانستان د منځنۍ او سوېلي آسیا پر سوداګریزې څلورلارې بدل کړي.
د وزارت په خبره، کله چې ټرانزیټي سیسټم پرعصري ټکنالوجۍ سمبال شي، د سیمې هېوادونو باور به لاپسې زیات شي.
د مالیې وزارت مرستیال دوست محمد مخلص وايي: « د مالي وزارت هڅه کوي افغانستان د منځنۍ او جنوبي آسیا ترمنځ د ټرانزیټ په یوه څلورلاره بدل کړي. د دې ډول سیسټمونو کارول کولی شي پر افغانستان د سیمې هېوادونو باور زیات کړي.»
د سوېلي آسیا د لوړ صنعت لپاره د منځنۍ آسیا طبیعي زېرمې د خامو موادو په توګه ښه انتخاب دی. د دغو توکو د انتقال لپاره د یوه ستراتیژيک موقیعت په توګه افغانستان یوه خوندي لاره ده چې ټرانزیټ به یې د جي.پي.اېس له نصبېدو سره لاپسې خوندي او د ډاډ وړ شي.
بله خوا، د دولتي شرکتونو چارواکي د افغانستان لپاره د یوه داسې ۶ رقمي پُسټي کوډ له جوړولو خبر ورکوي چې له نړیوالو معیارونو سره به برابر وي.
د دوی په خبره، د دې کوډ له مخې به د افغانستان ټولو سیمو لپاره ۱ زر ۴۰۵ نوي کوډونه جوړ شي چې له لارې به یې د هېواد ټولو سیمو ته د هرډول توکو استول اسانه شي او امنیتي پېښو ته به په وخت رسېدنه وشي.
دا په داسې حال کې ده چې له دې وړاندې افغانستان څلور رقمي پُسټي کوډ درلود چې په ۲۰۱۱ کال جوړ او د پُسټ نړیوالې اتحادیې له خوا تایید شوی و.
