په هېواد کې د وروستيو مرګونو سېلابونو له امله زيانمن شوي، چې له ځاني زيان سربېره يې ودان کورونه هم ویجاړ شوي، بېړنيو مرستو ته اړتيا لري.
د سرپرست حکومت چارواکي وايي، تر اوسه له سېلاب ځپلو سره د قطر خوراکي او غير خوراکي توکو د مرستو جوپه د مزار شریف هوايي ډګر ته رارسېدلې چي ژر به سېلاب ځپلو سیمو ته واستول شي.
د اقتصاد وزارت مسلکي معين عبدالطيف نظري وايي: « اسلامي امارت د بریالۍ ډيپلوماسۍ په رڼا کې نړیوالې ټولنې، ګاونډيو او د سیمې هېوادونو، ملي او نړیوالو موسسو او ملي سوداګرو ټولو په بغلان او نورو ولایتونو کې له زلزله ځپلو هېوادوالو سره د مرستې چمتووالی ښودلی او تر دې دمه له سېلاب ځپلو سره د قطر مرستو لومړنۍ جوپه هېواد ته رارسېدلې، چې ژر تر ژره به ان شاءالله زیانمنو کسانو ته ورسول شي.»
د نظري په خبره، نورو مرستندویه اداروهم د مرستو ژمنې کړي؛ خو غوښتنه کوي چې دغه بنسټونه دې هم په موقع خپلې مرستې زيانمنو کورنيو ته ورسوي.
په ورته مهال د ځېنو نورو مرستندویه ادارو ترڅنګ د ملګرو ملتونو د بشري مرستو همغږۍ ادارې (اوچا) ویلي، چې له همکارو موسسو سره د يادو زيانمنو شویو کورنيو ته پر مرستو رسولو بوخت دي.
اوچا زیاته کړې: « مرګونو سېلابونو سلکونو کسانو ته مرګ ژوبله واړوله او زرګونه کورونه يې د افغانستان په شمال کې ویجاړ کړل. موږ له خپلو مرستندویه ادارو سره ګډ کارو کوو، څو اغېزمنو کورنیو ته اړينې مرستې ورسوو.»
بلخوا د رئیس الوزرا اقتصادي مرستیال ملا عبدالغني برادر چي سیمي ته د ارزونې او د سېلابونو قربانيانو له کورنیو سره د ليدنې په موخه تللی؛ خلکو ته د بېړنیو مرستو، ژوبلو په درملنې، د خوراکي توکو او د لنډمهاله سرپناه پر برابرولو ټینګار کړی دی.
نوموړي ويلي، سیمې ته بېړنۍ مرستې رسېدلي او له شتمنو هېوادوالو یې غوښتي چې له سېلاب ځپلو سره مرستې ونه سپموي.
