د پکتیا مرکز ګردېز ښار یو شمېر اوسېدونکي وايي، پرون شپه یې د جګړې شدت له کبله په ویښه تېره کړې او له حکومته غواړي چې د ښار امنیت خوندي او شته ننګونې له منځه یوسي.
د مرکز ګردیز یو تن اوسېدونکی وايي: «ډیر بد وضعیت وو. ټوله شپه چا خوب نه دی کړی. جګړه د خطابې سېمه کې وه، خلک مشکل لري. ټول کورونه راووتل. حکومت نه ده چا د بې ځایه کیدو پوښتنه کوي او نه هم د تکلیف.»
د مرکز ګردیز یو بل اوسېدونکی بیا وايي: «ولسوالۍ ټولې سقوط شوې، که ولایت سقوط ته پریږدې، بیا دې خلک پرې نه مړه کوي. دوی طالبان او عسکر خو هسې هم په جګړو بوخت دي، خو ټول زیان یې ملکي وګړو ته رسېږي.»
اخوا د ولایتي شورا غړی محمد رحمان قادري بیا وایي، وسله وال د ښار په بېلا بېلو سېمو کې د ځای پر ځای کېدو په حال کې دي او له خلکو یې غوښتي، چې سیمې دې پریږدي.
قادري زیاته کړه:«د ګردیز هغه سیمې چې د طالبانو ولکه کې دي، له خلکو یې غوښتي چې سیمې پریږدې او دوی له دغو ځایونو پر حکومتي ځواکونو بریدونه کوي.»
