Skip to content
په تیرو شلو کلونو کې د پکتیا ولایت اریوب ځاځیو ولسوالۍ پر ۹۰ سلنه کرنیزو ځمکو چرس کرل کیدل،خو اوس دا کچه صفر شوې ده.
د یادې ولسوالۍ ولسوال ظاهرګل وایي، خلکو د دوی پر غوښتنه د نشه یي توکو له کرلو ډډه کړې او اسلامي امارت باید ورسره مرسته وکړي.
هغه زیاته کړه:« د چرسو موضوع پای ته رسیدلې. دلته نور بیا څوک نشه یي توکي نه کري صفر شوي دي،خلک یې د بدیل غوښتنه کوي.موږ ورسره ژمنه کړې ده،چې دوی ته به ورکول کېږي.»
بزګران هم وایي، د اسلامي امارت پر غوښتنه یې سږ کال خپلو ځمکو کې نشه یي توکي نه دي کرلي او باید د زعفرانو او یا داسې نورو حاصلاتو تخم په واک کې ورکړل شي،چې اریوب ځاځیو ولسوالۍ کې یې پایله ښه وي.
د اریوب ځاځیو ولسوالۍ کې یو تن بزګر وايي:« مخکې دلته ټولو بزګرانو چرس کرل، سږ کال د نشه یي توکو کرل بند شوي او خلکو لوبیا،کچالو او جوار کرلي دي.»
د اریوب ځاځیو ولسوالۍ کې یو بل بزګر بیا وايي:« د خلکو اقتصادي ستونزې ډېرې دي،حکومت کولای شي،چې زعفران او یا نور د داسې حاصلاتو تخم بزګرانو ته ورکړي، چې دلته یې پایله مثبته وي.»
بزګران همدا راز وایي، د وچکالۍ له کبله یې ډېری ځمکې شاړې شوي او په کمه برخه یې لوبیا، کچالو او جوار کرل شوي دي.
د اریوب ځاځیو ولسوالۍ کې یو تن بزګر وايي:« د خلکو ځمکې کمې دي. یو یا دوه پټي لري،چې لوبیا او جوار یې پرې کرلي،نور خو حکومت سږ کال چرسو کرل بند کړل. وچکالي ده.که نور څه وکري،ګټه نه کوي.»
د اریوب ځاځیو ولسوالۍ کې یو بل بزګر بیا وايي:« دا لښتي او خوړونه وګوره! مخکې به اوبه په کې راتلې، خو اوس وچ دي. موږ د اوبو په برخه کې ډېرې ستونزې لرو.»
د اریوب ځاځیو ولسوالۍ اوسېدونکي وایي، اسلامي امارت دې د نشه یي توکو نه کرلو په بدل کې د بیارغونې بېلابېلې پروژې ورکړي،ترڅو یو شمیر کسان په کې پر روزګار بوخت شي.
