د سرپرست حکومت لوړپوړي چارواکي له نورو هېوادونو سره پر متقابل درناوي او ګډو ګټو ولاړې اړیکي د وخت اړتیا بولي او له ټولو هېوادونو سره د مثبتو اړیکو جوړولو غوښتنه کوي.
دوی د خپلواکۍ د ۱۰۵ کلیزې په مناسبت جوړې شوې ناسته کې د خبرو پر مهال وویل، له ټولو هېوادونو سره مثبت تعامل غواړي او د نامشروع غوښتنو په صورت کې به هېچا ته اجازه ورنه کړي، چې د افغانستان په کورنیو چارو کې لاسوهنه وکړي.
د ریاستالوزا اداري مرستیال عبدالسلام حنفي خبرداری ورکوي، چې پر افغان خاوره تېری کوونکو ته به غاښ ماتونکی ځواب ورکړي.
حنفي زیاتوي:« هغه کسان چې د افغانستان د اشغالولو نیت لري، زموږ دوښمنان دي او په ټول ځواک به ورسره مبارزه وشي.»
چارواکي له افغانستان سره سیاسي او اقتصادي اړیکې د هېواد د پرمختګ لپاره مهمې ګڼي او له هېوادونو د متقابلو مثبتو اړیکو غوښتنه کوي.
د بهرنیو چارو وزارت سرپرست مولوي امیرخان متقي وايي: « له نورو هېوادونو سره د متقابل دروناوي په رڼا کې تعامل کول د سیاسي، اقتصادي او ټولنیز پرمختګ لپاره د وخت جدي اړتیا ده.»
د سرپرست حکومت چارواکي له هېوادونو سره د ښو اړيکو لرل د اقتصادي ودې او پرمختګ لپاره هم مهم بولي او له همدې کبله ډاډ ورکوي، چې افغانستان پر متقابل درناوي ولاړو مثبتو اړيکو پاللو ته چمتو دی.
د کورنیو چارو سرپرست سراجالدین حقاني وایي: « له نړۍ سره د مثبتو اړیکو ټينګول د وخت اړتیا ده. موږ باید له انزوا څخه د خپلو خلکو د ایستلو لپاره له نړۍ سره مثبت تعامل ته لاره هواره کړو.»
چارواکي په داسې حال کې له نړیوالو سره د مثبتو اړیکو پر لرلو ټینګار کوي، چې د سرپرست حکومت له واکمنېدو درې کاله اوړي، خو لاهم د هېڅ هېواد له لوري پر رسميت نه دی پېژندل شوی او یوازې پر دې خبره ټینګار کوي،چې په بهرنیو هېوادونو کې۴۰ ډيپلوماټيک آدرسونه فعال دي.
