پر ډېورنډ فرضي کرښه پروت تورخم ښارګوټي کې د کډوالو چارو ریاست مالومات ښيي چې له تېرې یوې اوونۍ راهیسې له پاکستانه ۲۵۰ افغانان په داسې حال کې افغانستان ته راستانه کړای شوي چې له ټولو سره پاکستان کې د اوسېدلو قانوني اسناد موجود وو.
د مسوولینو په خبره، هره ورځ له پاکستانه نږدې شل کورنۍ را ایستل کېږي.
په تورخم کې د کډوالو چارو مسوول بخت جمال ګوهر وايي: « پاکستان کې مشکلات دي او په ځانګړې توګه اسلام اباد کې. نیول شوي کسان هره ورځ دلته راوړل کېږي او په تېره یوه اوونۍ کې تقریبا ً ۲۵۰ تنه سپارل شوي دي. په دې کې اکثریت اسناد لرونکي کسان دي، خو بیا هم نیول شوي او دلته یې موږ ته را سپارلي دي.»
په همدې حال کې له پاکستانه راستانه شوي وايي، د پاکستاني پولیسو له لوري د افغانو نیولو او د دوی پر کورونو چاپې وهلو، دغه هېواد کې د افغان کډوالو ژوند ستونزمن کړی.
له پاکستانه تازه راستون شوی عزت خان وايي: « اوه کاله په پاکستان کې اوسېدم او هلته مې مزدوري کوله. په کور مې د پولیسو له خوا چاپه ووهل شوه او افغانستان ته یې را واړولم.»
له پاکستانه راستون شوی سلیمان وايي: « بچي مې په خپل ځای پاتې شول او زه یې تاڼې ته بوتلم. هلته وهل ټکول درکړي او درته وايي، ولې خپل وطن ته نه ځي. هلته ډېر حالات خراب دي او شپه ورځ د خلکو په کورونو چاپې وهي.»
که څه هم راستانه شوي کډوال هېواد ته پر راتګ خوښ دي، خو دلته د سرپناه او روزګار نه شتون ستونزو ته اندېښمن دي او له مسوولینو په دې برخه کې د همکارۍ غوښتنه کوي.
له پاکستانه راستون شوی کډوال عزت خان وايي: « موږ له حکومت غواړو چې د سرپناه ځایونه راته جوړ کړي، کور او کاروبار نه لرو او غوښتنه کوو چې دا راته برابر کړي.»
مسولین ډاډ ورکوي چې د کډوالو ستونزو ته متوجه دي او په نږدې راتلونکي کې به دغو کډوالو ته د ځمکو ویش بهیر هم پيل شي.
د ننګرهار کډوالو چارو رییس باز محمد عبد الرحم وايي: « په کمپونو کې د دوی لپاره ښې کوټې لرو، جامع او څو کوچني نور جوماتونه هم شته. کډوالو ته سهولتونه برابر دي او هڅه کېږي چې له کومې ستونزې سره مخ نه شي.»
پاکستان له تېرو دوو کالو راهیسې د افغانانو د جبرې ایستلو لړۍ چټکه کړې.
د مالوماتو له مخې، د پاکستان پولیس په دې هېواد کې د اوسېدلو قانوني اسناد لرونکي او بې اسنادو افغانانو ترمنځ توپير نه کوي او ټول له یوې مخې راباسي.
