د بلخ د اطلاعاتو او کلتور رياست چارسمبالی مولوي ذبيح الله نوراني نن یکشنبه د «۱۴۰۰ کال د تلې پر ۴ مه» له شمشاد سره په خبرو کې وویل،په دغه ولايت کې يې د لرغونو سيمو د خپلسرو کېندنو مخه نيولې ده.
د دې تر څنګ نوراني وايي، د لرغونو اثارو د ساتنې لپاره يې هم يو لړ ګامونه پورته کړي دي.
نوراني زیاتوي:« د بلخ ولايت ټول تاريخي اثار او آبدې له نږدې کتل شوي دي او د ساتنې لپاره يې ځانګړي کسان موظف شوي دي. همدا راز کومې کېندنې چې د تېر حکومت په دور کې کېدلې، د هغو مخنيوي هم شوی دی.»
نوراني وايي، هڅې یې پيل کړي دي،څو د بلخ د لرغونو سيمو او تاريخي اثارو د ليدنې لپاره کورنيو او بهرنيو سيلانيانو ته لا ډېره زمينه برابره کړي.
نوراني زیاته کړه:«هڅه دا ده،چې دغې برخې ته پاملرنه نوره هم زياته شي. د هېواد نورو ولايتونو سيلانيان يې ليدو ته راشي. همدا راز له نورو هېوادونو څخه هم سيلانيان راشي او له دغو لرغونو ځايونو څخه ليدنه وکړي.اوس هم که هغوی راشي، پر وړاندې به يې هېڅ ستونزه نه وي.»
په ورته مهال مزارشریف کې د فرهنګي چارو فعالان د تاريخي اثارو او لرغونو ځايونو پر ساتنې او خونديتوب ټينګار کوي.
د فرهنګي چارو فعال غلام علي ملکزی وايي:« له شته تاريخي اثارو بايد ساتنه وشي، په جدي ډول د دغو اثارو د تخريب او يا کيندنو مخه دې ونيول شي.»
مدني فعال ذبيح الله نیکزوی وايي:« د بلخ لرغوني اثار د سيلانيانو او همدا راز خپله د دې سيمې د خلکو لپاره د عوايدو له اړخه ډېر اهمیت لري، که وضعيت ښه وي،نو دلته به سيلانيان راځي او عوايد به يې ځايي خلکو او حکومت ته پاتې کېږي.»
بلخ د هېواد په شمال کې د تاريخي اثارو او لرغونو سېمو له اړخه شتمن ولايت دی،چې د ډېری لرغونو اثارو تاريخي مخينه يې زرګونو کلونو ته رسېږي.
