Skip to content
پېښو ته د رسېدو په چارو کې د دولت وزارت مسوولین وايي، د هېواد په ۲۱ ولایتونو کې د تېرې یوې میاشتې سختو سېلابونو او یو شمېر سیمو کې زلزلو څه باندې ۲۰۰ کسان مړه کړي او شااوخوا ۱۵۰ یې ټپيان کړي دي.
د یاد وزارت ویاند محمد نسیم حقاني وايي،پروان، ننګرهار، لغمان، لوګر او میدان وردګ هغه ولایتونه دي،چې سېلابونو په کې زیات تلفات اړولي دي.
حقاني زیاته کړې:«د چنګاښ میاشتې له لومړۍ بیا تر اوسه پورې د هېواد په بېلابېلو ولایتونو کې سېلابونه راغلل،یعنې دا سېلابونو په شااوخوا ۲۱ ولایتونو کې ول. د دغو سېلابونو له امله ۱۹۴ هېوادوال مو په شهادت رسېدلي دي،له ۲۶۰ زیات کسان ژوبل شوي دي. دغه راز د دغو سېلابونو له امله له ۱۲ زرو زیات کورونه په بشپړ او نیمه ډول وېجاړ شوي دي.»
حقاني وايي، تېره اوونۍ د کونړ ولایت په یو شمېر ولسوالیو کې شدیدې زلزلې هم شپږ کسان مړه او لسګونه کورونه یې په بشپړ ډول وېجاړ کړي دي.
هغه زیاته کړه:« د کونړ ولایت په نورګل او چپې درې کې د زلزلې تلفات زیات ول،چې زموږ شپږ تنه هېوادوال په کې شهیدان شوي او شااوخوا ۱۰ نور ژوبل ول. دغه راز په ننګرهار کې هم ۱۰ کسان ژوبل شوي ول. هغوی ته اولیه مرستې رسېدلي دي. د کومو کسانو،چې کورونه تخریب شوي، هغوی ته په لومړیو کې خیمې او خوراکي توکي ورسېدل.»
سېلابونو خلکو ته د ځاني زیان ترڅنګ ګڼ مالي زیانونه هم اړولي دي.
د کرنې او اوبو لګونې وزارت ویاند مصباح الدین مستعین د نږدې ۱۰ زره جریبه کرنیزې او غیر کرنیزې ځمکې د تخریب خبره هم کوي.
پېښو ته د رسیدو چارو کې د دولت وزارت او د کرنې او اوبو لګولو وزارت مسوولینو ډاډ ښودلی دی،چې تر یوه بریده له سېلاب ځپلو سره دوامداره مرستې تر سره شي.
دوی همدا راز ډاډ وښود،چې له خیریه موسساتو سره یې خبرې روانې دي،چې د سېلابونو او زلزلو له کبله زیانمن شوي کورونه هم ورغوي.
