پېښو ته د رسېدنې په چارو کې د دولت وزارت وایي، شااوخوا ۴ زره او ۵۰۰ سوداګریز مرکزونه او پمپ سټیشنونه یې پېژندلي،چې د اور وژنې لومړني توکي نه لري.
د یاد وزارت د پیښو انسجام کمیټې چارو مرستیال محمد قاسم حیدري د کابل ښار په دروازو کې د ټانکرونو دریدل، له برېښنا ناسمه ګټه اخېستل او د سوداګریزو مرکزونو اطفایو نه درلودل، د اور لګیدنې او لوړ زیان لاملونه یاد کړل.
پیښو ته د رسېدنې په چارو کې د دولت وزارت د پیښو د انسجام کمیټې چارو مرستیال محمد قاسم حیدري وايي: « مالومه شوه،چې د کارو بار ځایونه په غیر منظم ډول د یو بل تر څنګ دي. دې ځایونو کې د برېښنا له غیر معیاري او کم ظرفیته مزو د پکې، بخارۍ، کولر او نور وسایلو روښانه کولو له پاره کار اخېستل کېږي، چې دا چاره د اور لګېدو لامل کېږي. همدارنګه د کابل په دروازو او په پمپ سټیشنونو کې د ګازو او تېلو ټانکرونو زیات درېدل هم جدي ستونزه ده.»
کورنیو چارو وزارت،چې د پيښو د انسجام کمیټې غړی دی، سوداګریزو او د تیلو پمپ سټیشنونو ته خبرداری ورکړ، که ژر تر ژره د اورلګیدنې ضد تدابیر ونه نیسي، نو له قانوني چلند سره به مخ شي.
د پیښو انسجام کمیټې غړی جنرال سید نظام الدین پاچا وايي: « ټولو سوداګریزونو مرکزونو او د پمپ سټیشنونو مالکینو ته خبر ورکول کېږي، هرڅومره ژر چې کېږي، د کمېټې له لوري وړاندې شوي تدابېر رعایت کړي. »
ښاروالي،چې د پیښو د انسجام کمېټې غړېتوب لري، بیا د داسې یوې طرحې خبر ورکړ، چې د اورلګیدنې مخنیوې په موخه به پمپ سټیشنونه معیاري کړي.
کابل ښاروالۍ دغه راز د لوړو ودانیو لپاره هم طرحه جوړه کړې، چې له مخې به یې و ارزول او معیاري به شي
