د پکتیکا یحی خیلو ولسوالۍ کې د پنځو نظامي قوماندانانو په ګډون څلور پنځوس وسله والو ته مرګ ژوبله اوښتې.
د پکتیکا امنیه قوماندان سمونوال نثار عبدالرحیمزی وایي، نن سهار وسله والو د یحی خیلو ولسوالۍ په اته خونې سیمه کې د امنیتي ځواکونو پر پوستو بریدونه وکړل، چې د افغان هوایي او ځمکنیو ځواکونو له سخت غبرګون سره مخامخ شول.
عبدالرحیمزی زیاتوي چې په نښتو کې د وسله والو د پنځه نظامي قوماندانانو په ګډون ۳۸ وسله وال وژل شوي او ۱۶ نور یې ټپیان دي.
د پکتیکا امنیه قوماندان همدا راز وایي چې د دې ولایت د امنیت امر اصف توخي چې سیمې ته د افغان ځواکونو مرستې ته روان و، د ماین په یوه چاودنه کې وژل شوی او د ځانګړو ځواکونو قوماندان خانزاده کاروان او دری سرتیري ټپیان دي.
طالبانو دغه نښته کې خپل لوري ته د اوښتې مرګ ژوبلې په اړه څه نه دي ویلي خو ادعا کړې چې د امنیت امر په ګډون یې اته سرتیري وژلي او پنځه نور یې ټپیان کړي دي.
