Skip to content
په پکتیا کې شپږ خصوصي راډیو ګانې د ایف ایم پر څپو خپرونې لري، چې یو شمیر یې اوس له سختو مالي ستونزو سره مخامخ دي.
د خصوصي راډیوګانو مسوولین وایي،له کلونو راهیسې یې د سوداګریزو اعلاناتو د خپریدو په مرسته فعالیتونه روان دي،خو د طالبانو له راتګ وروسته یې د بازار موندنې برخه پر ټپه ولاړه ده.
څمکنیو ولسوالۍ کې د یوې خصوصي راډیو مشر بخت زائیل وايي:« د مارکیټینګ برخه مو پر ټپه ولاړه ده. وړاندې مو له یو شمېر خصوصي شرکتونو سره معاملې وې او د هغوی اعلانات به مو خپرول. اوس دا برخه ډېره کمزورې شوې.»
د څمکنیو ولسوالۍ کې د یوې خصوصي راډیو مشر رحمت الله هېوادمل وايي:«که چېرې چارواکي مرسته ونه کړي، د دې ډېر امکان شته،چې په ډېری سیمه ییزو رسنیو کې بدلون راشي او یا هم وتړل شي.»
د دغو سیمه ییزو راډګانو خبریالان بیا وایي، د کار پر وړاندې یې امنیتي ننګونې نه شته،خو د مالي ستونزو له کبله تنخواوې نه لري.
د یوې خصوصي راډیو خبریال ذاخیل ذکي وايي:«موږ چې کومو سېمو ته د راپور جوړولو په موخه ځو، له خلکو سره خبرې کوو،نو خلک خوښ دي،چې د رسنیو کارکوونکي دوی ته ورتلی او غږ ته یې انعکاس ور کولی شي.»
د یوې خصوصي راډیو خبریال محمد زمان مبارز وايي:« دلته رسنیو سره، چې کوم کارکوونکي دي، هغه تنخواوو ته اړتیا لري. پیسو ته اړتیا لري، نو فکر نه کوم،چې د رسنیو مسوولین دوی ته دا مصارف پوره کړي.»
د دې تر څنګ پکتیا کې له څلورو میاشتو راهیسې پنځو چاپي رسنیو د مالي ستونزو له کبله فعالیتونه ځنډولي او مسوولین یې وایي، که مرستې ورسره وشي، له ځنډ پرته به خپل کارونه بېرته پیل کړي.
