په پکتیا ولایت سلګونه کسانو لاریون کړی دی او د جګړې له ښکیلو خواوو یې د جګړې بندیدو او عمومي اوربند غوښتنه وکړه.
لاریون کوونکي وایي، د بهرنیو ځواکونو له وتلو وروسته د جګړې دوام افغان وژنه ده او حکومت او طالبان دې روانه خونړۍ جګړه ودروي او ژر دې د سولې مذاکرات پیل کړي.
لاریون کوونکی امان الله خان ځدراڼ وايي:« سرتاسري سوله غواړو. دوامداره امنیت غواړو. دوامداره اوربند غواړو. ورور وژنه نه غواړو. وېنه توئیدنه بندوو.»
یو تن بل لاریون کوونکی وایي:« د بهرنیو ځواکونو له وتلو وروسته یوازې جګړه یوازې افغان وژنه او مسلمان وژنه ده، نور هېڅ نه دي. له استعمار وروسته،په ارګ چې زموږ مشران دي، دوحه کې چې کوم مشران دي، هر قتل چې دلته کېږي، دوی یې مسوول دي.»
په ورته وخت کې لاریون کوونکو د ملیشو له جوړولو سره هم مخالفت وښود او له حکومت یې غوښتنه کوله،چې د فعالیت اجازه دې نه ورکوي او امنیتي بنسټونه دې پیاوړي کړي .
دوی همدا راز له طالبانو هم وغوښتل، چې د تاسیساتو له ورانولو دې ډډه وکړي.
د پکتیا ولایتي شورا مشر عبدالمالک ځاځی وايي:« د افغغانستان اسلامي جمهوري دولت هېچ چا ته باید د شخصي خپلسرو ملیشو جوړولو اجازه ورنه کړي.»
د پکتیا ولایتي شورا غړی محمد رحمن قادري وايي:« ترڅو پورې چې د سولې خبرې پای ته رسېږي، باید اوربند وشي. نور باید قتلونه او د عامه تاسیساتو ورانول بند شي. درېیمه موضوع دا ده،چې ولس له ملیشه جوړنې په تنګ راغلی دی،ځکه هغه په راتلوونکې دولت ته سرخوږی جوړېږي.»
پکتیا د هېواد یو د هغو ولایتونو له ډلې دی، چې له نیمایي ډېرې ولسوالۍ یې طالبانو نیولي او زرګونه کورنۍ بې ځایه شوي او جګړه یو شمیر سیمو کې د ګردیز ښار څنډو ته رسیدلې.
