د پکتیا ولایت میرزکې ولسوالۍ کړکین درې ته غځیدلې لار چې د همدې سیمې نږدې ۱۰۰۰ کورنۍ ترې د هر راز اړتیاوو د پوره کېدو لپاره ګټه واخلي، د خرابوالي له امله یې خلک ستونزو سره مخ کړي.
تازه له همدې کړاو د خلاصون لپاره د سیمې اوسېدونکو په خپل لګښت د سړک جوړولو چارې پیل کړې، چې لګښت يې شاوخوا دوه میلیونه افغانۍ اټکل شوی.
د سیمې یو تن اوسېدونکی وايي:« د کړکین ولس بیخي مظلومه ولس ده، هغه بله ورځ زما د ترې مېرمنه مړه وه، پر دغې لاره یې جنازه ښکته کړه. په ګردیز کې مړه شوې وه. جنازه په سخته ده، غله په ستونزه کې ده. په دوبي کې هره ورځ سېلاب راځي.»
د سیمې یو بل اوسېدونکی بیا وايي:« په دغه سیمه کې شاوخوا ۸۰۰ کورنۍ ژوند کوي، د دې کورنیو ناروغان، مړي، ټول له ستونزو سره مخ دي، هېڅ وخت ناروغ پر وخت کلینیک ته نه شي رسېدلی.»
د خلکو په خبره لسیزې کیږي، چې هېڅ حکومت یې د ستونزو د حل په تړاو اقدام نه دی کړی او د ژوند ګڼې اړتیاوې په همدې نږدې اته کیلومټره پلې لار د حیواناتو په مرسته پوره کوي.
د دوی په خبره که یې حکومت ملاتړ ونه کړي، ښايي دا شته هڅه یې هم په نیمه کې پاتې شي.
د سیمې یو تن اوسېدونکی وايي:« موږ هېڅ شی نه لرو، زه سړک ته راغلی یم، له تاسو مو هېله دا ده، چې غږ مو ټولو دولتونو ته ورسوئ.»
ورته مهال ځایي چارواکي هم د مرزکې ولسوالۍ کړکین درې د اوسېدونکو ستونزې مني او په خبره يې سیمې ته د سړک نشتون دا خلک د ژوند له سخت کړاو سره مخ کړي.
د دغې ولسوالۍ مرستیال خالد وايي، هڅه به وکړي څو لوړپوړي چارواکي د یادې ستونزې د حل په تړاو متوجې کړي.
خالد زیاتوي:« کورونه یې هم زیانمنوي، لارې یې هم زیانمنوي، بیا دوی هم کرار ناست نه دي، عریضې یې کړي او هغه مو اړوند مرجع ته لېږلي. انشاء الله له اړوند مرجع څخه د کرنې برخه کې ډاډ راکړل شوی، د کلیو بیارغونې برخه کې دا به په وخت سره د بودیجې په شتون سره دغه پروژې او د دوی ( خلکو) ستونزې به خامخا حل کړو.»
د پکتیا ميرزکې ولسوالۍ کړکین درې اوسېدونکي د لارې نشتون سربېره د پوهنې او روغتیا برخو د کم رنګه خدماتو له امله هم سختو ستونزو سره لاس او ګرېوان دي، چې له سرپرست حکومت یې د ژر تر ژره هواري غوښتنه کوي.
