په سوېل کې د پکتیا ولایت ځايي چارواکي وايي، په مرکز او ولسوالیو کې یې شااوخوا ۸۴ زره کسانو ته د کار په بدل کې غنم ورکول کیږي او کاریګر به ویالي او کاریزونه پاک کوي او سړکونه به جوړوي.
د ولایت مقام استازی نقیب الله سنګین وايي:« پکتیا ته تقریبا۱۱۳۰ ټنه غنم ورکړل شوي. د راتلونکي لپاره هم نور راکول کیږي.هغه کسان چې بې روزکاره دي،هغوی ته به کار ورکړل شي،پکتیا کې اوس شااوخوا ۸۴ زره کسان پر کار مصروف دي.»
د طرزالعمل له مخې،هر کاریګر ته د ورځې ۱۰ کیلو غنم ورکول کیږي او پکتیا کې دغه لنډ مهال کار ته کاریګر خوشاله دي
د پکتیا یو تن اوسېدونکی وايي:« شپږ ورځې کار دی، د ورځې لس کیلو غنم راکوي ، دا شپږ ورځې کار دی. زموږ د بزګرانو دا کانال چې پاک شي، فصلونو ته به اوبه په سم ډول رسیږي.»
د پکیتا یو بل اوسېدونکی بیا وايي:« موږ دلته لاره باندې شګې اچوو. موږد غنمو په بدل کې کار ته ډېر خوشاله یو،چې هم کار کیږي او هم غنم را کول کیږي.»
کاریګر همدا راز وایي، دغه لنډ مهاله کار او بشري مرستې یې شته اقتصادي ستونزې نه شي هوارولی او اسلامي امارت دې د بیارغونې بېلابېلې پروژې پيل کړي،ترڅو د اوږد مهال لپاره ورته د کار زمینه برابره شي
د پکتیا یو تن اوسېدونکی وايي:« موږ له اسلامي امارته غواړو،چې موږ ته کار پیدا کړي. دا خو ویاله وه، لکه خپل کار څو ورځې دی. دا خو به ختم شي. دلته ډېری ځوانان بې روزګاره دي.»
د پکتیا یو بل اوسېدونکی بیا وايي:« طبیعي زیرمې را وباسئ. له چا سره قرارداد وکړئ. په دې بشري مرستو مو درد نه دوا کیږي.»
د مالوماتو له مخې،مرکزي ادارې پکتیا ته ۱۱۳۰ ټنه غنم ورکړي او مرکز او ولسوالیو کې به خلکو ته د کار په بدل کې ورکول کیږي
