Skip to content
د پکتیا مرستیال والي محمد طله وايي، په مرکز ګردیز ښار کې د یونسیف له لوري د پنځه میلیونه افغانیو په لګښت د څښاک اوبو د یوې شبکې د جوړېدو چارې پیل شوې.
طله وایي، د اوبو رسولو دغې شبکې چارې به تر راتلوونکو څلورو میاشتو پورې بشپړې شي او په بشپړېدو سره به یې د سیمې اوسېدونکو د څښاک اوبو د کموالي ستونزه هواره شي.
هغه زیاته کړه:« د خوښۍ ځای دی، چې ګردیز ښار کې د یونسیف له لوري د شااوخوا پنځه میلیونه افغانیو په لګښت د څښاک اوبو رسولو پروژه پلې کېږي. موږ د هر راز همکارۍ ډاډ ورکوو.»
د یونسیف استازی فضل عاصم وایي، د دغې پروژې په پلي کیدو سره به سیمه کې ۲۰۰ کورنیو ته د څښاک اوبه برابرې شي.
عاصم زیاتوي:«د دغې پروژې مالي لګښت یونسیف ورکوي او په پلي کېدو سره به یې ۲۰۰ کورنیو ته د څښاک پاکې اوبه برابرې شي.»
د سېمې اوسېدونکي بیا وايي، له ډېرې مودې راهیسې د څښاک اوبو له کموالي سره مخ دي او د دغې شبکې په بشپړېدو سره به د اوبو ستونزه هواره شي.
د ګردیز یوتن اوسېدونکی وايي:« له ډېرې مودې راهیسې د اوبو له کموالي سره مخامخ یو. یوه څاه په ۷۰ مترونو کې اوبه ورکوي، چې د ډېرو خلکو وس ورته نه رسېږي او که دغه پروژه پلې شي، زموږ د اوبو ستونزه به هواره شي.»
د مرکز ګردیز ښار یو بل اوسېدونکی وايي:« الحمدلله موږ ډېر خوشاله یو، چې سیمه کې مو د اوبو رسولو شبکې د جوړېدو چارې پیل شوې، دغه خلک د اوبو کموالي له ستونزې سره مخ دي.»
د پکتیا مرستیال والي محمد طله له مرستندویه بنسټونو غواړي، چې دغه ولایت کې دې بېلابېلو برخو کې پروژې پلې کړي او دوی یې هر راز همکارۍ ته چمتو دي.
