Skip to content
په سویل کې د پکتیا امنیه قوماندانۍ د جنایي جرمونو پر وړاندې د مبارزې مدیر بسم الله احمد وايي، په تیرو شپږو میاشتو کې په ۱۴۵ جنایي پیښو کې ۲۸۲ کسان نیول شوي دي.
احمد وايي، دغه کسان د قتل،غلا، انسان تښتونې او نشه یي توکو د قاچاق او پلور په تور نیول شوي او عدلیي او قضایي ارګانونو ته سپارل شوي دي.
احمد زیاتوي:« زموږ تر مدیریت په تیرو شپږو میاشتو کې د بېلابېلو جرمونو ۱۴۵ پیښې را رسیدلي دي. په دغو جنایي پیښو کې ۲۸۲ تورن کسان نیول شوي او عدلیي او قضایي ارګانونو ته سپارل شوي دي.»
د امنیه قوماندانۍ ویاند عمر بدري بیا وايي، تېره یوه میاشت کې څه باندې ۱۱۰۰کیلو ګرامه نشه یي توکي نیول شوي او ۷۷ روږدي یې د درملنې لپاره روغتون ته لیږدولي دي.
بدري زیاتوي:« په تېره یوه میاشت کې مو تقریبا ۱۱۵۷ کیلو ګرامه چرس ، ۴۵ ګرامه مو هیروئین نیولي او همدا رنګه مو ۷۷ پر نشه یي توکو روږدي کسان د درملنې لپاره روغتون ته معرفي کړي دي.»
د پکتیا یو شمیر اوسېدونکي د اسلامي امارت له واکمندیدو را وروسته د جنایي پیښو کموالی مني او له مسوولینو غواړي، چې دغه کچه دې صفر دې راټیټه کړي.
د پکتیا یو تن اوسېدونکی وايي:« دوی باید خپلې کزمې او استخباراتي مالومات زیات او هغه کسان دې ونیسي،چې ښار او ولسوالیو کې غلاوې،قتلونه او نور بېلابېل جرمونه ترسره کوي.»
د پکتیا یو بل اوسېدونکی بیا وايي:«وضعیت خو د اسلامي امارت په راتګ سره ښه شوی دی، جنایي پیښې کمې شوي،خو هېله مو دا ده،چې دغه کچه صفر کړي.»
پکتیا امنیه قومانداني وایي، تیرو شپږو میاشتو کې یې پنځه ځله عملیات ترسره کړي، چې پر وینا یې محدود شمیر ښځینه پولیسو هم په کې ونډه درلوده.
