د پکتیا ولایت مرکز ګردیز ښار د موټرو د ترمیم په یوه سرای کې لسګونه ماشومان پر درنو کارونو بوخت دي.
دغه ماشومان وايي، د کورنیو اقتصادي ستونزو د حل لپاره له ډېرو ماشومانو ښوونځي پاتې شوي او اړ دي چې د کسب زده کولو په موخه درنو کارونو ته مخه کړي.
د رحمتالله په نوم یو کاریګر ماشوم وايي: « تر درېیم ټولګي مې مکتب ویلی، اقتصاد ضعیفه و، نو بیا ما دا کار شروع کړ. دوه کاله کېږي چې دا کار کوم. اقتصاد ضعیفه و نو دې کار ته راغلم ترڅو کار زده کړم، له مکتب نه وتلی یم.»
د همت په نوم یوبل کاریګر ماشوم وايي: «مستري توب کوم، د اقتصادي مشکلاتو له امله دلته کار زده کوم، ترڅلورم ټولګي پورې مې مکتب هم ویلی.»
ورته مهال، یو شمېر نور ماشومان هم وایي چې د فقر او بېوزلۍ له امله ښوونځیو ته نه ځي او په هغو پیسو چې له کار کولو يې تر لاسه کوي، د خپلې کورنۍ اړتیاوې پوره کوي.
دوی هیله لري چې سرپرست حکومت د ماشومانو د ښې راتلونکې لپاره منظم پروګرامونه پلي کړي.
د مسعود په نوم کاریګر ماشوم وايي:« ستونزه دا ده چې موږ د کورنۍ لپاره ډوډۍ پیدا کړو. پلار مې رالېږلی یم چې له نورو ماشومانو سر ډوډۍ پيدا کړم، مکتب ته رسيدګي نه کېږي.»
یو بل ماشوم فضل الرحمن وايي: « زموږ خو دا ټول په زړه کې آرمانونه دي، چې نه کېږي څه وکړو؟ مکتب هم وایو چې یو څه زده کړو، موږ له مجبورۍ کار کوو.»
اخوا ځایي چارواکي ډاډ ورکوي چې په پکتیا کې یې د سرپرست حکومت او همکارو موسسو پر مټ هڅې پيل کړې چې درنو کارونو بوخت ماشومانو ته اسانتیاوې رامنځته کړي، ترڅو د اقتصادي ستونزو له هواري سربېره، خپلو زده کړو ته هم دوام ورکړي.
د پکتیا اقتصاد رئیس محمد یونس راشد وايي: «هغه ماشومان چې هغه شاقه کارونه کوي یا له ستونزو سره مخامخ دي، ډېر مو ځینې ایستلي دي او نور هم لېستونه برابر شوي او په راتلونکط هم هڅه کوو چې د موسساتو له خوا هم دوی ته داسې فرصتونه برابر شي چې دوی له درنو کارونو راوګرځي، له ستونزو خلاص شي، هم د تعلیم او هم نورو برخو کې د کار زمینه برابره شي.»
د پکتيا د کار او ټولنيزو چارو ریاست د مالوماتو له مخې، دا مهال يوازې د دې ولایت په مرکز ګردېز کې شاوخوا۵۰۰ تنه ماشومان پر درنو کارونو بوخت دي.
