د پکتیا کرنې ریاست مشر عبدالروف سعید وايي، له پلازمېنې ورته ۱۱۰۰ میټریک ټڼه غنم استول شوي او خلکو ته به مرکز ګردیز او ولسوالیو کې د کاریزونو، ویالو او سړکونو جوړولو په بدل کې دورځې لس کیلو ګرامه غنم ورکول کیږي.
سعید زیاته کړه:« په مرکز ګردیز او ولسوالیو کې به خلکو ته د ویالو، کاریزونو او سړکونو جوړولو بدل کې ورکول کیږي. هر کاریګر به د ورځې ۱۰ کیلو ګرامه غنم تر لاسه کوي.»
سعید وایي، تر اوسه پورې یې د ګاریګرو ۵۰۰ عریضې تر لاسه کړي او پلان دا دی، چې له دې لارې ۴ زرو کسانو ته د کار زمینه برابره شي.
هغه زیاته کړه:« زموږ ریاست ته شااوخوا ۵۰۰ عریضې جمعه شوي دي. همدا راز نورو ریاستونو ته هم جمع شوي دي. هڅه او پلان دا دی،چې له دې لارې څلور زرو کسانو ته د کار زمینه برابریږي.»
یو شمیر کاریګر چې له اوږدې مودې بې روزګاره دي د کار بدل کې د غنمو ورکولو ته خوشاله دي او وایي، له دې لارې به د کورنۍ لومړنۍ اړتیاوې پوره کړي،
په پکتیا کې یو تن کاریګر وايي:« موږ ډېر خوشاله یو. دلته کار کوو، پرون مو هم کار وکړ. نور هم کار ته داوم ورکوو. له اسلامي امارته مو غوښتنه دا ده،چې موږ ته دې د کار زمینه برابره کړي.»
په پکتیا کې یو بل کاریګر وايي:« موږ ته د کار زمینه برابره شوې ده. ډېر ورته خوشاله یو،چې د کار زمینه برابره شوې. له اوږدې مودې بې روزګاره یو. هره ورځ به چوک ته تلو،خو کار نه پیدا کېده.»
د نورو ولایتونو په څیر د وروستیو سیاسي تحولاتو له امله په پکتیا کې هم د بې روزګارۍ کچه لوړه شوې او په ټولییز ډول غوښتنه دا ده، چې اسلامي امارت او مرستندویه بنسټونه دې د بیارغونې پروژو کارونه پیل کړي، ترڅو خلکو ته د کار زمینه برابره شي.
