پکتیا مستوفیت: یو شمېر شرکتونو له تېرو ۱۸ کالونو راهېسې مالیه نه ده ورکړې

د پکتیا مستوفي احمد الله حقاني وایي،په دغه ولایت کې  یو شمېر شرکتونه او اصناف یې له تیرو ۱۸ کلونو راهیسې پوروړي دي او تر اوسه پورې  یې مالیه نه ده تحویل کړې. 

حقاني  وايي، د دغو شرکتونو او اصنافو پر وړاندې به نږدې راتلونکي کې جدي اقدامات وشي. 

حقاني زیاته کړه:« بدبختانه باید ووایم،چې داسې شرکتونه او اصناف شته  دی،چې له ۱۳۸۲ کال راهیسې یې مالیات نه دي تحویل کړي. مرکز ته مو په دې اړه راپور ورکړی او نږدې راتلونکي کې به یې پر وړاندې جدي اقدامات وشي.»

حقاني پرته له دې چې د راټولو شویو عواید ارقام له رسنیو سره شریک کړي وایي، عوایدو کې یې د تیر کال پرتله ۴۰ سلنه زیاتوالی راغلی  دی.

نوموړی یې لامل له یو شمیر زورواکو او پنځو هغو ولسوالیو کې د عوایدو راټولول بولي، چې مخکې په کې د ناامنۍ له کبله مالیه نه وه راټوله شوې.

حقاني زیاتوي:« د عوایدو په فیصدي کې تقریبا له څلویښت تر ۱۰۰ سلنه زیاتوالی راغلی او مرکز او ولسوالیو کې عواید په شفاف ډول راټول شوي دي.» 

یو شمیر صنعت کاران له اسلامي امارته غواړي،چې د صنعت له پیاوړتیا سره دې مرسته وکړي او په ځینو برخو کې دې دوی ته مالیات معاف کړي. 

صنعت کار فضل الدین جلالزی وايي:« اول څلور سلنه انتفاعي مالیه اخېستل کېږي،یو ځل ګمرک ورکوو، بیا څلور سلنه انتفاعي مالیه ،د جواز قیمت ورکوو او د جواز تصفیه ورکوو.»

 صنعت کار فضل الله بهاند بیا وايي:« نن سبا خصوصي سکتور دومره وده کړې ده،چې له ګاونډیو هېوادونو سره سیالي کولي شي،خو په دې شرط چې اسلامي امارت یې هر اړخېزه ملاتړ وکړي.»

د مستوفیت چارواکي وایي، تر راتلونکې یوې اوونۍ به پکتیا کې ملکي مامورینو ته د لړم او لیندۍ میاشتو تنخواوې هم ورکړل شي.