پکتیا لجې منګل ولسوالۍ اوسېدونکي: کلینک کې د درملو نه شتون له امله ستونزو سره مخ یو 

په سوېل کې د پکتیا لجه منګل ولسوالۍ اوسیدونکي وايي، کلینک کې د درملو او تشکیل کموالي تر څنګ، ودانۍ یې نظامي تاسیساتو ته څېرمه ته  ده،چې مخکې د جګړو له کبله کرایي کور ته انتقال شو او اوس په کې ولسوالي فعاله ده .

د لجې منګل ولسوالۍ یو تن اوسېدونکی وايي:« د روغتیا برخه کې دلته ستونزې زیاتې دي.کلنیک مخکې د جګړو له کبله له خپلې ودانۍ کرایي کور ته انتقال شوی دی. نه پوهیږو، چې څومره کرایه به ورکوي، د درملو او تشکیل کموالی خو له پخوا نه موجود دی.»

د لجې منګل ولسوالۍ یو بل اوسېدونکی بیا وايي:« موږ ته دې بل ځای کې مجهز کلینیک جوړ کړي،چې  وړ ډاکتران ولري،ځای ورته قوم ورکوي،خو دوی دې  راته جوړ کړي.»

د لجه منګل روغتیایي مرکز مشر طاهر وایي، کلنیک د جګړو له کبله کرایي کور ته انتقال شوی، د درملو د کموالي ستونزه هواره شوې او په خبره یې یوازې د ښځینه ډاکترې بست خالي لري. 

طاهر زیاته کړه:«د کلینیک ودانۍ پوځي تاسیساتو ته نږدې وه،بیا موږ د سختو جګړو له کبله اړه شوو،چې کرایي کور ته یې انتقال کړو، تر اوسه دلته یو.»

د لجه منګل ولسوال وایي،د کلنیک ودانۍ نظامي تاسیساتو ته څېرمه او جګړه کې زیانمنه شوې ده او اسلامي امارت پلان لري،چې بله سیمه کې کلینک ته ودانۍ جوړه کړي. 

هغه زیاته کړ ه:«د ولسوالۍ ودانۍ نه شته دی. دا کلنیک دی،چې ولسوالۍ او قوماندانۍ ته څیرمه دی. دا ځای او ورته د ناروغانو راتګ بیخي مناسب نه دی، اسلامي امارت هڅه کوي،چې یوه بله سیمه کې کلنیک ته ودانۍ جوړه کړي.»

لجه منګل د ګردیز ــ پټان پر لویه لاره پرته او غرنۍ ولسوالي ده،چې مخکني حکومت ورته پام نه دی کړی او اوسیدونکي یې وایي،بېلابېلو برخو کې د ژوند له لومړنیو اسانتیاوو بې برخې دي.