ځايي خلک وايي، لویو لارو کې ماینونه ځای پر ځای شوي او پر کورونا وبا اخته کسان ګردیز ته نه شي لېږدولی، چې له امله یې د مثبتو پیښو او مړینو کچه لوړه شوې ده.
جاني خیل ، څمکني ، پټان ، لجه منګل ، احمدخیل ، اریوب ځاځي میرزکې او روحاني بابا هغه ولسوالۍ دي،چې د طالبانو نیولي او پر لویو لارو خلک د ماینونو له وېرې تګ راتګ نه شي کولی.
د یو شمیر ولسوالیو اوسېدونکي چې څو ورځې وړاندې ګردیز کې د کورونا روغتون ته راغلي، د خپلو سیمو کیسې کوي.
د اریوب ځاځيو ولسوالۍ یو تن اوسېدونکی وايي: « له اریوب ځاځيو ولسوالۍ راغلي یو، دا پنځه یا شپږ ورځې کېږي، چې ولسوالۍ طالبانو په لاس کې ده. هلته هېڅ ډول تدابیر نشته لارې بندې دي او خلک له ګڼو ستونزو سره مخامخ دي.»
د پټان ولسوالۍ یو تن اوسېدونکی ایوب بیا وايي: « مشکل زیات دي. دا څلور ورځې کېږي، چې دلته مې ناروغ راوړی دی. لارې ټولې بندې دي او هلته ګڼ کسان پر کورونا وبا اخته شوي دي.»
بل پلو عامې روغتیا ریاست هم مني،چې د لارو بندیدو له کبله له څو ورځو راهیسې مرکز ګردیز ته پر کورونا اخته کسان نه دي ورلېږدول شوي.
د پکتیا عامې روغتیا ریاست مشر ولایت خان احمدزی وايي:« له څو ورځو راهیسې له ولسوالیو مرکز ګردیز ته ناروغان نه دي راغلي. لارې بندې دي، ستونزې زیات دي او خلک کوشش کوي، چې هلته خپلو سیمو کې درملنه وکړي.»
په ټولییز ډول پکتیا کې د مثبتو پیښو شمیر زیات شوی او د کورونا روغتون مسوولین وایي، تر اوسه پورې د اکسیجن پلانټ نه دی فعال شوی او راتلوونکو ورځو کې ښايي د اکسیجن له کموالي سره مخ شي.
پکتیا کې د کورونا روغتون سرطبیب قدوس څمکنی وايي:« کورونا وبا مثبتې پیښې او ناروغان زیات دي. د مړینې پیښې هم شته مشکل دا دی، چې تر اوسه پورې اکسیجن پلانټ نه دی فعال شوی او باید ژر تر ژره فعال شي.»
د روغتیا وزارت د مالوماتو له مخې، په پکتیا ولایت کې پر کورونا وبا د اخته کسانو شمېر له ۲ زره او ۵۰۰ لوړ شوی او ۱۲۷ کسان ترې مړه شوي دي.
