د پکتیا اوسېدونکی وايي:« الله دې وکړي، چې نجونو ته له شپږم ټولګي د پورته زده کړو اجازه ورکړي. زده کړه خو د نارینه وو په څېر د نجونو هم حق دی.»
د پکتیا ولایت یو بل اوسېدونکی وایي:« تنخوا نه شته دی. تعلمیم نه شته دی دا کوم ښوونځي پرانیستي دي. هلته زده کړې نه شته دی، ځکه نشته، چې تنخوا نه ورکول کېږي ، تقریبا د پنځو میاشتو تنخوا نه دی ورکړل شوې.»
خالده پکتیا کې د نجونو د یوه ښوونځي ښوونکې ده او له اسلامي امارت غواړي، چې نجونو ته دې د ثانوي زده کړو د اجازې تر څنګ لیرې پرتو سیمو ښوونځیو ته ځانګړی پام وکړي.
ښوونکې خالده وايي:«له اسلامي امارته زما غوښتنه دا ده، چې نجونو ته دې د ثانوي زده کړو د اجازې تر څنګ لیرې پرتو سیمو کې د ښوونځیو وضعیت ته ځانکړی پام وکړي، ځکه چې هلته ستونزې ډېرې دي، ودانۍ نه شته دي، کتابونه نه شته، هېڅ هم نه شته.»
اخوا د پوهنې ریاست ویاند مولوي شیر وايي، وزارت ته یې په پرلپسې ډول د نجونو د ثانوي زده کړو د پیل وړاندیزونه کړي او ډاډ ورکړل شوی، چې نږدې ورځو کې به دغه بهیر پیل شي.
شیر زیاتوي:«خپله مو هڅه کړې او وزارت ته مو څو ځله وړاندیز کړی، چې پکتیا کې دې هم نجونو ته د ثانوي زده کړو اجازه ورکړل شي، تر څو نجونې ښوونځیو ته ولاړې شي او درسونه یې پاتې نه شي.»
د دې تر څنګ زرمت ولسوالۍ کې له اوو کلونو راهیسې د نجونو ۱۳ ښوونځي تړلي او پوهنې ریاست وایي، د دغه ښوونځیو پرانېستل یې لومړیتوب دی او په اړه یې جدي هڅې روانې دي.
د هېواد د ۳۴ ولایتونو له ډلې د ګوتو په شمېر ولایتونو کې نجونو ته د ثانوي زده کړو اجازه ورکړل شوې او د پاتې ولایتونو د نجونو برخلیک لا څرګند نه دی.
