پکتیا اوسېدونکي: د بانکونو تړل کېدو مو ورځنی ژوند سخت  کړی

د پکتیا  ولایت یو شمېر اوسېدونکي وايي، د بانکونو تړل کېدو یې ورځنی ژوند سخت کړی او په خبره یې ډېری کسان دومره پیسې نه لري، چې د کورنیو لپاره پرې خوراکي توکي واخلي.

ګردیز ښار کې یو شمیر کسان هره ورځ د بانکونو مخې ته په هېله تیروي،چې ګوندې خلاص به شي خو وایي، مسوولین یوازې ژمنې ورکوي.

د ګردیز ښار یو تن اوسېدونکی وايي: «باور وکړه،چې کور کې د خوړلو لپاره څه نه لرو، له اوړو نیولې غوړي او ان مالګه هم نه لرو.»

د ګردیز ښار یو تن اوسېدونکی وايي: «له ۱۵ ورځو ډېره موده کېږي، چې هره ورځ دلته د بانک مخې ته تېروم. ستونزه لرم،پیسو مې اړتیا ده دا ټول خلک د پیسو اخېستلو لپاره راغلي دي.»

د ګردیز ښار یو تن اوسېدونکی وايي: «تقریبا له ۲۵ ورځو ډېره موده کېږي، چې بانکونه تړلي دي. خلکو ته هره ورځې د پرانېستلو ژمنې ورکول کېږي خو عملي کېږي.»

ګردیز ښار کې د صرافانو مارکیټ پرانیستی،خو وایي، روزګار یې له بانکونو سره تړلی او د اسلامي امارت مسوولین یې باید د پرانیستلو هڅې وکړي.

ګردیز ښار کې یو تن  صراف وايي: «زموږ روزګار له بانکونو سره تړلی دی، کله چې تړلي وي، زموږ پر کار منفي اغیز کوي. له اسلامي امارته مو غوښتنه دا ده،چې د بانکونو په پرانېستلو کې دې مرسته وکړي.»

ګردیز ښار کې یو تن  صراف وايي: «د بانکونو تړل کېدل زموږ پر کار ډېر بد اغیز کوي،ځکه پیسې ټولې له بانکونو سره دي. زموږ مشکل د بانکونو له خلاصیدو پرته نه حل کېږي.»

د ګردیز د صرافانو ټولنې مشر رمضان بیا وایي، له بهرنیو هېوادونو د ونډۍ له لارې د پیسو لېږد هم ۹۵ سلنه پر ټپه دریدلی دی.

رمضان زیاته کړه: «د ونډۍ له لارې له بهرنیو هېوادونو د پیسو لېږد ۹۵ سلنه پر ټپه دریدلی او یوازې پنځه سلنه دغه لېږد تر سره کېږي.»

له اونیو راهیسې د بانکونو تړل کیدو له کبله بازارونو کې د خوراکي او نورو توکو بیې هم  په بې ساري ډول لوړې شوي او په ټولییز ډول غوښتنه دا ده، چې طالبان دې د بانکو پرانیستلو ته لومړیتوب ورکړي.