د اریوب روغتون مشر ایوب وایي، له دغې بمبارۍ را وروسته تر دا مهاله په ښځو کې د سینې سرطان او ماشومانو ضایع کیدو پیښې ډېرې شوي دي.
هغه زیاته کړه:«کوم چې موږ لېدلي، له امریکایانو راوروسته، یو خو هغه ښځې زیاتې راځي،چې د سینې سرطان لري. دا زیاتې شوي دي. بل هغه میندې،چې حمل ولري، تقریبا پنځمه،په شپږمه یا هم پر اومه میاشت سقط کوي.»
په ورته وخت کې ایوب وايي، هغه ماشومان،چې پر وخت نړۍ ته راشي،ډېری یې سو شکل وي.
هغه زیاته کړه:« ځینې ماشومان سو شکل پیدا کېږي. یا یې نیم سر نه وي، یا شپږ ګوتی وي یا د لاس سو شکل وي. دا درې واقعات دي،چې موږ سره مخ شوي یو. د امریکایانو له بمباریو راوروسته اریوب ځاځیو ولسوالۍ کې دا واقعات زیات شوي دي.»
اریوب ځاځیو کې د امریکایي ځواکونو له لوري د غورځول شویو بمونو اغیز پر نباتاتو هم لا پاتې دی او د یو شمیر ونو میوې تر پخیدو نه رسیږي.
د اریوب ځاځیو ولسوالۍ یو تن اوسېدونکی سورګل وايي:« دا مڼې وګوره! تاسو ته مالومېږي، داسې یو مرض پرې لګېدلی دی،چې مڼې خپله توییږي. د مڼو ځینې ونې بار نه نیسي.»
