Skip to content
په سوېل کې د پکتیا ولایت زرمت ولسوالۍ په سهاکو سیمه کې د اسلامي امارت له لوري د امارت لېکو کې د وژل شویو کسانو ماشومانو له لپاره ځانګړې مدرسه جوړه شوې ده.
د مدرسې یو تن ښوونکی عبدالباري وايي:« تقریبا ۶۳ یتیمان موږ دلته مدرسه کې لرو،چې زده کړې کوي.نور خو کورونو کې ډېر دي،دا چي کوچني زده کړې نه شي کولی او ځینې نور د نږدې سیمو دي، چې له درس وروسته کورونو ته ځي.»
عبدالباري همدا راز وایي، دغو یتمو ماشومانو ته د مهال ویش له مخې زده کړې او روزنه ورکول کېږي.
عبدالباري زیاته کړه:« د دوی لپاره مو په بشپړ ډول د درس زمینه برابره کړې،د مهال ویش له مخې مو ورته درسونه برابر کړي دي.»
د دغو یتیمو ماشومانو له ډلې هر یو یې د تیرو کلونو جګړو او د بهرنیو ځواکونو چاپو کې د وژل شویو پلرونو له درده ډکې کیسي لري او وایي، د زده کړو وس یې نه درلود او د مدرسې پر جوړیدو خوشاله دي.
د مدرسې یو تن زده کوونکی وايي:« زموږ کلي ته امریکایان راغلي ول. زما پلار امریکایانو په بمبار کې شهید شو. زه یتیم یم، خپله مې زده کړه نه شوه کولی او دلته مدرسې ته راغلم.»
د مدرسې یو بل زده کوونکی بیا وايي:« ډار و. مخکې مو درس نه شو ویلی، اوس ازادي راغله طالب راغلی. اوس الحمدلله په ډاډه زړه دلته زده کړې کوو.»
د ۲۰ کلنې جګړې په پایله کې لسګونه زره ماشومان بې سرپرسته او له ورته برخلیک سره مخامخ دي،چې د اسلامي امارت مسوولینو ویلي، د طالبانو او عسکرو یتیمانو ته په یوه سترګه ګوري او د زده کړو زمینه ورته برابروي.
