د پکتیا سیدکرم ولسوالۍ کې د افغان امنیتي ځواکونو لیکو کې د پنځو وژل شویو وروڼو کورنۍ،چې وروستی یې د خان محمد په نوم کال وړاندې ووژل شو،اوس د جګړې له ښکیلو غاړو غواړي،چې سوله او اوربند وکړي.
د دغه کورنۍ غړي وایي،د جګړې له امله یې ډېر درد لیدلی او د ژوند ټولې هیلې یې مړاوې شوي او په خبره یې اوس یې ستره هېله د جګړې بندیدل دي.
د پنځو سرتیرو وروڼو له ډلې یوازې دوو یې ودونو کړي او اوس یې ماشومان بې سرپرته پاتې دي.
د وژل شوي سرتېري مېرمن وايي: « پنځه وروڼه ټول وژل شوي، وروستی زما خاوند وه،چې هغه هم کال وړاندې ووژل شو.»
دوی اصلا د سیدکرم ولسوالۍ کوهسین سیمې اوسیدونکي دي، خو د وسله والو له ویرې خپلې کلي ته نه شي تلی او اوس د سید کرم یوه بله سیمه کې ژوند کوي.
دوی وايي، د جګړې درد یې لیدلی او ښکیلې غاړې دې نور د جګړې د دوام پلمې نه لټوي.
د وژل شوي سرتیري میرمن وايي:« ډېرې مېندې کونډې شوي، زه د جګړې له ښکېلو اړخونو غواړم،چې د جګړې دوام پلمې دې نه لټوي، اوربند او سوله دې وکړي.»
د دغې کورنۍ غړي وایې، حکومت او مرستندویه موسیسو ورسره لازمه مرسته نه ده کړې،له سختو اقتصادي ستونزه مخ دي او په خبره یې د کلیوالو په خیرات او صدقه یې ژوند روان دی.
