د پکتیا ځايي چارواکي وايي، امنیتي ځواکونو د سیدکرم او احمد اباد ولسوالۍ د وسله والو له شتونه پاکې کړي او په خبره یې د ختیځو نورو ولسوالیو د نیولو عملیات روان دي.
دوی وايي، له عملیاتو سره هم مهاله د ولسوالیو له نیولو سره سیمو کې امنیتي ځواکونه ځای پرځای کیږي او عملیات به تر هغه دوام وکړي ، چې ټولې له لاسه وتلې ولسوالۍ بیرته نه وي نیول شوي .
د سید کرم ولسوالۍ له پاره نوی ټاکلی شوی ولسوال علي جان محمدي له خلکو د همکارۍ غوښتنه وکړه.
محمدي زیاته کړه:« د ولسوال په توګه زه لومړی پر خپل ولس غږ کوم،چې راپورته شي، خپله ولسوالي، کلی او سېمې دې وساتي. له خپلې خاورې او سېمې دې په مېړانه دفاع وکړي او ترڅنګ یې امنیتي ځواکونه هم شته. »
اوونۍ وړاندې د پکتیا د ۱۴ ولسوالیو له ډلې نهه یې د طالبانو لاس ولوېدې، چې له ډلې یې سید کرم او احمد اباد ولسوالۍ بېرته نیول شوي دي.
د امینه قوماندان سمونوال ایمل نیازي وايي، پیل شوي عملیات به تر هغې پورې دوام وکړي، ترڅو چې ټولې له لاسه وتلې ولسوالۍ بیرته نه وي نیول شوي.
نیازی زیاته کړه:« دا عملیات به دوام وکړي، تر ډنډ پټان ولسوالۍ پوري،چې اخري او سرحدي ولسوالي ده. انشاء الله دا ټولې سېمې به پاکېږي او امنیتي ځواکونه به په کې ځای پر ځای شي. زموز پرسونل روحیه ډېره لوړه او دلته ښه همغږي لرو. »
چارواکي وايي، د ولسوالیو له نېول کېدو وروسته به له هغو امنیتي کسانو او قومي مشرانو سره قانوني چلند وشي، چې د سېمو په پرېښودلو کې یې له وسله والو سره همکاري کړي ده.
