د پښتون ژغورنې غورځنګ مشر یوځل بیا په تيرا او کرمه کې د پاکستان د پوځ پر روانو پوځي عملیاتو سختې نیوکه کړې.
منظور احمد پښتین پر خپله فېسبوک پاڼه په دې اړه تند احتجاج کړی او له وسلهوالو سره د مبارزې په نوم له خپلو مېنو د پښتنو جبري ایستل او بېځایه کول یې د پاکستان ریاست اصلي پالیسي بللې.
نوموړي وایلي، پوځ په یوه او بله پلمه هلته د پښتنو پر وړاندې ظلم او جبر روان کړی او موخه یې یوازې د هغوی ځورول، سپکاوی او د شتمنیو لوټل ده.
منظور احمد پښتین ویلي: « د پوځي عملیاتو په نوم د پښتو د شتمنیو او وسایلو لوټ تالان او د هغوی سپکاوی او ځورول د پنجابي پوځ او سیاسي رهبرۍ اصلي پالیسي ده. دوی د دې کار لپاره د انساني حقونو خلاف له محکمو د وسلې او ابزار په توګه کار اخلي.»
پښتین دا هم ویلي چې هلته روان وضعیت خلک له رواني ناروغۍ او ذهني عذاب سره مخ کړي. هغه د پاکستان ریاست نه یوازې د پښتنو او بلوڅانو بلکې د ټول انسانیت دښمن بللی او له هرې ممکنه لارې يې پر وړاندې د درېدو غږ کړی.
د تیرا اوسېدونکي په ساړه ژمي او وژونکې یخه هوا کې د پوځ له خوا د ماشومانو، ښځو او بوډاګانو بېځایه کول او له خپلو کورونو شړل بشري جنایت بولي او وايي، که د جبري بېځایه کولو مخه ونه نیول شي، انساني فاجعه به رامنځته شي.
د تیرا یو تن اوسېدونکی وايي: « نن د کورمې او تیرا ماشومان، ښځې او بوډاګان په دې واوره کې پراته دي. دا زما په واورو کې حصار واړه ماشومان که د پنجاب بچیان وای، اوس به په پخو کورونو کې ناست وو، خو دا چې د پښتنو بچي دي، ځکه یې په واور کې حصار کړي. زموږ خلک په واورو کې پراته دي او کورونو کې مو حکومت نظامي عملیات کوي.»
بل پلو، د چارو شنونکي وايي، پوځ په قصدي ډول دغه وخت ځکه په تيرا کې د پوځي عملیاتو لپاره ټاکلی چې له یوې خوا د خلکو له مجبورۍ زیاته استفاده وکړي او له بلې خوا په راتلونکي کې وسلهوالو ډلو ته د ځای پر ځای کېدو زمینه برابره کړي.
د سیاسي چارو شنونکی شهسوار سنګروال وايي: « له پاکستان څخه د دوستۍ تمه نه کېږي، د دوی حکومت دا کار د دښمنۍ لپاره کوي. له یوې خوا پښتانه په ډېر ناوړه حالت کې له خپلو کورونو څخه وباسي او له بلې خوا غواړي په دې سیمو کې د داعش وسله وال ځای پرځای کړي. دوی دغه کار له دې وړاندې د بلوچستان په مستونګ کې وکړ او اوس غواړي دلته یې وکړي.»
له دې ټولو سره، د پاکستان اطلاعاتو وزارت په یوه اعلامیه کې د پوځ او فډرالي حکومت له لوري د یادې سیمې د اوسېدونکو جبري بېځایه کولو موضوع رد کړې ده.
د پاکستان اطلاعاتو وزارت ویلي: «دغه ادعا بې اساسه، پر ناسمو باورونو ولاړه او د ځانګړو موخو لپاره مطرح شوې چې موخه یې په خلکو کې د وېرې خپرول، د امنیتي ادارو پر ضد د ناسمو معلوماتو ورکړه، شخصي او سیاسي اهدافو ته رسېدنه ده. د فډرالي حکومت او یا پوځ له خوا په تېرا کې خلکو ته د سیمو د پرېښودو په تړاو هېڅراز حکم نه دی شوی.»
دا هرڅه داسې مهال دي چې د پاکستان پوځ له تېرو څو اوونیو راهیسې په تیرا دره او کورمه کې د وسلهوالو ډلو پر وړاندې د عملیاتو په نوم، د پښتنو کلي او کورونه په نښه کړي او زرګونه ځايي اوسېدونکي یې له خپلو مېنو جبري بېځایه کېدو ته اړ کړي دي.
