د پښتون ژغورنې غورځنګ مشر وايي، د پاکستان پوځ په تیرا کې پوځي عملیات د وسلهوالو پرضد نه بلکې د پښتنو ځپلو او د پيسو ترلاسه کولو لپاره پیل کړي دي.
منظور احمد پښتین د ډیورند فرضي کرښې پورې غاړه د خيبر ايجنسۍ په تیراه او مرکزي کرمه کې د پاکستان پوځ له لوري روان عملیات د پښتون وژنې لویه دسیسه بولي.
پښتین ویلي، د پاکستان پوځ یادو سیمو کې پښتانه چې ښځې، ماشومان او پاخه عمر لرونکي کسان هم په کې شامل دي، د وسلهوالو ضد عملیاتو په پلمه له خپلو کورونو ایستلي او دامهال تر شنه اسمان لاندې د ژمي په سړه هوا کې ورځې شپې تېروي.
نوموړي د پاکستاني رژیم عملیات د پوځ ډالري جګړه بللې چې په خبره يې یوازې پښتانه او د هغوی مېنې او کورونه په نښه کېږي.
د پښتون ژغورنې غورځنګ مشر زیاته کړې: « په تیرا او مرکزي کورمه کې د ښځو، ماشومانو، سپین ږیرو او سپین سرو د ژمي په سړه هوا او واوره کې او له لومړنیو اسانتیاوو بې برخې په کېږدیو کې یا تر شنه اسمان لاندې ژوند انساني غمیزه رامنځته کړې. د ریاستي جبر دغه کړنې د بېځایه کېدو درېدلو په ځای هغه لاپسې پراخوي، خو د اغېزمن شویو غږ څوک نه اوري.»
منظور احمد پښتین د پښتنو په مسایلو کې د خیبرپښتونخوا د چارواکو او نورو ګوندونو پر دریځ هم تندې نیوکې کړې او وايي، هلته حکومت د پښتنو د وینو او اوښکو په موضوع کې یوازې بیانات ورکوي، خو د خپلو مشرانو او غړیو د خلاصون په موخه به په پراخو لاریونو او احتجاجونو لاس پورې کوي.
د پښتون ژغورنې غورځنګ مشر منظور احمد پشتین ویلي: « د خیبرپښتونخوا چارواکو هغه څرګندونې کافي نه دي چې وايي موږ دغو پوځي عملیاتو ته اجازه نه ورکوو. که دا خبرې حقیقت وي، نو هغه ډول یې باید مزاحمت وشي څه ډول چې یې د خپلو بندیانو د خلاصون په موخه کوي. په دغو څرګندونو او دریځونو کې هغه مهال د خبرو او عمل ترمنځ توپیر جوتېږي چې کله د پښتنو د وینې او اوښکو خبره شي، یوازې په بیاناتو بسنه کېږي مګرکله چې د خپلو بندیانو ستونزه پېښېږي، اعتراضي غونډې او احتجاجونه کېږي.»
د پښتون ژغورنې غورځنګ مشر د پښتونخوا او قبايلي ولس څخه غوښتي چې د دوی پر وړاندې د پاکستاني پوځيانو روان ظلمونه هېر نه کړي.
د پيټياېم غړي د پښتنو په سیمو کې د پوځ عملیاتو پر وړاندې د مخالفت او د يادو عملياتو درولو ډاډ ورکوي.
د پښتون ژغورنې غورځنګ غړی شېراز مومند وايي: « موږ په کلکه د دغو عملیاتو غندنه او مخالفت کوو او مخنیوی به یې کوو او له نړیوالو څخه هم دا غوښتنه کوو چې له پاکستاني پوځ څخه دغه مطالبه وکړي چې دا عملیات ودروي.»
د چارو شنوونکي د پښتنو پر وړاندې د پاکستان روان زور او جبر اوسنی نه بولي بلکې د دوی په خبره، د پاکستان پوځ د مشخصو پالیسیو له مخې په پښتونخوا کې دا دول کړنې له څو لسیزو راهیسې روانې کړې دي.
د دوی په خبره، پاکستان نه یوازې دا چې خيبرپښتونخوا او قبايلو کې عام خلک ځپي بلکې په خپله پاکستان کې هم نور ازادي پلوه قومونه ارام ژوند ته نه پرېږدي.
د سیاسي چارو شنونکی شهسوار سنګروال وايي: « د پنجاب حکومت د پښتنو خلاف تل دا ډول انساني، اسلامي ضد عملونه کړي دي، هغه ورځ را رسېدونکې ده، ولسونه به را وېښ شي او د پنجاب حکومت پر وړاندې به په پاڅون لاس پوري کړي مګر ښه خبره دا ده چې پاکستان له دغو ظلمونو لاس واخلي او نور دا بېوزله ولس ونه ځپي.»
د پاکستان پوځ له دې وړاندې د «ضرب غضب»، «عزم استحکام» او «سر به کف» په نومونو بېلو بېلو عملیاتو کې زرګونه پښتانه مشران او عام خلک وژلي او کلي او کورونه یې ویجاړ کړي دي.
د دې هرڅه پر وړاندې يې د ملګرو ملتونو په شمول نړیوالواو سیمهییزو بنسټونو نه یوازې دا چې د پاکستان روان کړي جبر مخه نه ده نيولې بلکې ترې دمه یې په اړه چوپتیا غوره کړې ده.
