د امریکا بهرنیو چارو وزارت ویاند مرستیال وېډانټ پټېل وايي، له اسلامي امارت سره د خپلو ملي ګټو او له افغانانو د ملاتړ لپاره تعامل کوي او ترهغې به ترې لاس وانخلي چې د هېواد ګټې یې په کې مطرح وي.
د پټېل په خبره، له افغانانو د ملاتړ او د امریکا ملي ګټو لپاره دغه ډول تعامل اړین دی چې پرمټ یې کېدای شي امریکايي بندیان ازاد او له ترهګرۍ سره د مبارزې په برخه کې ترې ګټه واخلي.
پټېل زیاتوي: « له طالبانو سره تر هغې له تعامل نه لاس پر سر کېږو چې د هېواد ګټې مو مطرح وي، دا یوازې د امریکا د ګټو خوندیتوب لپاره نه، بلکې له افغانانو د ملاتړ لپاره هم غوره لاره ده. له طالبانو سره تعامل مو له دوی سره د مستقیمو خبرو لپاره زمینه برابروي، دغه تعامل د هغو امریکایي بندیانو د ژر تر ژره او بې قید و شرطه خلاصون برخه کې د فشار راوړلو لپاره چې بندیان دي یو ښه فرصت دی، له دغې لارې امریکا کولی شي څو د ترهګرۍ پر وړاندې مبارزې برخه کې ګټه واخلي او د بشري حقونو مساله هم په کاري اجنډا کې شامله ده.»
اوس غوښتنه دا ده چې افغان حکومت هم باید د اسلامي ارزښتونو او ملي ګټو په رڼا کې له ټولې نړۍ سره د مثبت تعامل لار خپله کړي او له امریکا او نړیوالو سره تعامل نه یوازې د افغانستان، بلکې د ټولې سیمې په ګټه کار بلل کیږي.
د سیاسي چارو شنونکی شهزاده مسعود وايي: « د افغانستان اوسنی حکومت د افغانستان ملي ګټو او اسلامي ارزښتونو ته په کتو باید له ټولو هېوادونو سره د مثبت تعامل لاره خپله کړي. که چېرې په اوسنیو شرایطو کې امریکا هم چې د نړۍ یو لوی ځواک دی دغسې د یوه مثبت تعامل لاره له افغانستان سره خپله کړي؛ نو زه دا ښکاره د افغانستان او سیمې په ګټه بولم.\»
په ورته وخت کې اسلامي امارت وايي، له ټولو هېوادونو سره تعامل او په متقابل درناوي ولاړې ښې اړیکې غواړي.
د اسلامي امارت ویاند مرستیال حمدالله فطرت وايي، دا چې واشنګټن د تعامل خبره کړې نو ا سلامي امارت هم د امریکا په ګډون له ټولې اروپا سره د داسې اړیکو پراختیا ته لېواله دی، لکه د افغانستان او اسلامي نړۍ اړیکې.
فطرت وايي: « د افغانستان اسلامي امارت د امریکا په شمول له ټولو هېوادونو سره ښې او مثبتې اړیکې غواړي او اسلامي امارت له پخوا پر دې تمرکز او باور لري چې د سیاسي تعاملاتو او ډیپلوماټیکو اړیکو له لارې کولی شو چې ټولو موضوعاتو او مسایلو ته مناسبه د حل لار پیدا کړو. دا چې امریکا غواړي له افغانستان سره د تعامل ډګر ته راشي د افغانستان اسلامي امارت هم غواړي د امریکا په شمول له ټولو غربي هېوادونو سره لکه څنګه چې د سیمې او اسلامي نړۍ له هېوادونو سره مثبتې اړیکې لري له دوی سره هم خپلو ډیپلوماټيکو اړیکو ته پراختیا ورکړي.»
د امریکا بهرنیو چارو وزارت د ویاند مرستیال یوې خبرې ناستې ته په خپلو خبرو کې وویل، چې د بشري حقونو مساله یې هم په کاري اجنډا کې شامله ده.
اسلامي امارت بیا له وړاندې ویلي، چې له هېڅ هېواد سره ستونزه نه لري، بهرنۍ پالېسي یې اقتصاد محوره ده او د رسمیت پېژندنې ټول هغه معیارونه یې پوره کړي چې یو هېواد ورته اړتیا لري.
